Kristján neitar að mæta á nefndarfund

„Honum ber að koma fyrir nefndina. Honum ber að útskýra hvað vakir fyrir honum varðandi ráðuneytið og líka hver viðbrögðin eiga að vera í því stóra máli sem hrákjötsmálið er.“

Þingmönnum sumum var heitt í hamsi á þingi þar sem Kristján Þór Júlíusson fæst ekki til að mæta á fund atvinnuveganefndar. Það var Sigurður Páll Jónsson sem fyrstur gerði athugasemdir við afstöðu ráðherrans.

„Það er leiður ósiður ef hæstvirtir ráðherrar fara að stunda það að neita nefndum um að sinna eftirlitshlutverki sínu og neita að mæta á nefndarfundi þegar nefndarmenn kalla eftir því. Ég man eftir öðru tiltölulega nýlegu dæmi þegar hæstvirtur fjármálaráðherra neitaði að mæta fyrir stjórnskipunar- og eftirlitsnefnd vegna þess að hann taldi sig þá þegar hafa útskýrt það í fjölmiðlum að hafa falið nokkrar skýrslur fyrir fjölmiðlum og Alþingi. Hann taldi sig þar af leiðandi ekki þurfa að útskýra það fyrir þinginu, eftirlitsaðila sínum,“ sagði Þórhildur Sunna Ævarsdóttir.

„Það er nokkuð sem ekki má verða óskrifuð regla á þinginu. Ég hvet forseta til þess að hvetja alla hæstvirta ráðherra eindregið til þess að sinna skyldum sínum og mæta á fundi nefnda Alþingis,“ sagði hún.

Gunnar Bragi Sveinsson sagði: „Mig langar að biðja hæstvirtan forseta að beita sér í þessu máli, að sjá til þess að hæstvirtur landbúnaðar- og sjávarútvegsráðherra komi fyrir nefndina og ræði þessi mikilvægu mál. Það er hluti af eftirlitshlutverki okkar þingmanna að fá ráðherra til að skýra mál sitt. Við getum haft alls konar skoðanir á því hvað ráðherrann er að gera. Honum ber að koma fyrir nefndina. Honum ber að útskýra hvað vakir fyrir honum varðandi ráðuneytið og líka hver viðbrögðin eiga að vera í því stóra máli sem hrákjötsmálið er. Það getur ekki verið að hæstvirtur ráðherra líti svo á að þetta sé ekki stórt mál, þetta komi ekki þinginu við.“

„Þess vegna bið ég hæstvirtan forseta að beita sér fyrir því að útskýra það fyrir hæstvirtur ráðherra að hans hlutverk er líka að koma fyrir nefndina, koma fyrir þingmenn, ræða við þingmenn og útskýra afstöðu sína þar. Eftir því hefur verið óskað ítrekað að ráðherra komi fyrir þessa nefnd. Ég hvet hæstvirtan forseta til að beita sér í því.“

Steingrímur J. sagðist hafa heyrt hvað þingmenn höfðu að segja.

Alþingi