Ásmundur, Vilhjálmur og Silja á móti
Þingmaður Miðflokksins segir þingmenn hafa verið ábúðarfulla en samt ekki viljað „leiðrétta ranglætið“.
Alþingi Birgir Þórarinsson, þingmaður Miðflokksins í Suðurkjördæmi, sagði á Alþingi að Reykjanesbær hafi boðað til fundar, rétt fyrir kosningar með þingmönnum Suðurkjördæmis og fleirum, þar sem bærinn lagði fram skýrslu sem sýndi fram á að svæðið fengi hlutfallslega lægri fjárveitingar til opinberra stofnana en sambærilegar stofnanir á landsbyggðinni. „Þingmenn voru ábúðarfullir og sögðu að það yrði að leiðrétta ranglætið strax,“ sagði Birgir.
„Ég sem hér stend flutti breytingartillögu við fjárlagafrumvarpið þess efnis að leiðrétta nú ranglætið á Suðurnesjum og lagði til aukafjárveitingu til Heilbrigðisstofnunar Suðurnesja upp á 90 milljónir og lögreglustjórans á Suðurnesjum upp á 70 milljónir. Því er skemmst frá að segja að þingmenn búsettir á Suðurnesjum, háttvirtir þingmenn Ásmundur Friðriksson, Silja Dögg Gunnarsdóttir og Vilhjálmur Árnason, sögðu nei við breytingartillögu minni. Suðurnesjaþingmenn sem höfnuðu því að auka útgjöld til Suðurnesja verða að standa frammi fyrir kjósendum sínum og útskýra hvers vegna,“ sagði hann.
