Borgin í ábyrgðum fyrir 100 milljarða
„Hér er um hreina ábyrgð borgarsjóðs að ræða upp á eitt hundrað milljarða króna. Hundrað þúsund milljónir.“
„Tilgangurinn verði að draga kerfisbundið úr áhættum borgarsjóðs af lántökum fyrirtækjanna,“ segir í tillögu Dags B. Eggertssonar borgarstjóra.
Dagur leggur til að endurskoðaðar verði reglur borgarinnar um veitingu ábyrgða á skuldbindingum félaga í B-hluta samstæðu Reykjavíkurborgar. Hann vill að stofnaður verði sérstakur sjóður á vegum borgarinnar, Ábyrgðasjóður; „…til að tryggja getu borgarinnar til að mæta þeim skyldum sem leiða af veitingu ábyrgða ef fyrirtæki í eigu borgarinnar sem notið hafa ábyrgðar á endurgreiðslu lána geta ekki að hluta eða öllu leyti staðið undir greiðsluskuldbindingum sínum.“
„Hér staðfestist hversu mikil ábyrgð borgarinnar er af dótturfélögum sínum. Hér er um hreina ábyrgð borgarsjóðs að ræða upp á eitt hundrað milljarða króna. Hundrað þúsund milljónir. Það er því nauðsynlegt fyrir borgina að vera með varasjóð til að mæta mögulegum áföllum hjá fyrirtækjum hennar,“ segir í bókun Sjálfstæðisflokks og Miðflokks.
„Ábyrgðarsjóður endurspeglar fyrst og fremst ráðdeild í fjármálum borgarinnar. Hér er þó aðeins verið að raungera það sem gert hefur verið um árabil enda hefur handbært fé borgarinnar verið mikið á undanförnum árum til þess að geta varið sig fyrir stórum og smáum áföllum í efnahagslífi. Þessum ábyrgðarsjóði er því ætlað að vera nokkurskonar varasjóður sem gripið verður til ef fjárhagur borgarinnar versnar skyndilega,“ segir í bókun meirihlutans.
Í tillögu borgarstjórans segir ennfremur:
„Gert er ráð fyrir 3 ma.kr. stofnframlagi í sjóðinn en auk þess renni tekjur af ábyrgðargjaldi sem áætlaðar eru um 579 m.kr. árið 2019 og 10% af tekjum af arðgreiðslum sem áætlaðar eru um 182 m.kr. árið 2019 í sjóðinn. Nánari útfærsla á þessari tillögu verður lögð fyrir borgarráð.“
„Auk beinna ábyrgða „ber borgin mikla ábyrgð á Félagsbústöðum í heild“ eins og segir í greinargerð. Ófjármagnað er gat í fjárhagsáætlun Félagsbústaða sem ekki hefur verið leyst. Þá er bent á að tekjur OR í erlendum gjaldeyri voru á síðasta ári 6,2 milljarðar en vaxtagjöld og afborganir 11,6 milljarðar og er því gengisáhætta til staðar. Eðlilegast væri að OR fjármagnaði sig án ábyrgðar borgarsjóðs í stað þess að borgin þurfi að stofna sérstakan ábyrgðarsjóð,“ segir einnig í bókun Sjálfstæðisflokks og Miðflokks.
