Davíð varar við Sjálfstæðisflokki

„...og því miður hefur lítið verið gert síðan til að vinda ofan af álögunum og jafnvel verið bætt í á sumum sviðum.“

Umræðan Leiðari Morgunblaðsins í dag, er sem svo oft áður, helgaður skattaálögum. Allt frá því að ríkisstjórn Jóhönnu og Steingríms tók við og til dagsins í dag. Davíð Oddsson hefur verið óþreytandi að benda á að þær ríkisstjórn sem hafa setið síðan, og Sjálfstæðisflokkurinn einn flokka átt aðild að þeim báðum, þ.e. ríkisstjórn Sigmundar Davíðs og Sigurðar Inga og svo ríkisstjórn Bjarna Benediktssonar, hafa litlu og nánast engu breytt í skattagleði vinstri stjórnarinnar.

„Fyrir þessu háa tryggingagjaldi eru engin haldbær rök og fyrir flest fyrirtæki er þessi hækkun tryggingagjaldsins gríðarlega íþyngjandi. Laun hafa hækkað mikið á liðnum misserum með miklum kjarabótum í þeirri litlu verðbólgu sem verið hefur. Þetta er fagnaðarefni, en felur líka í sér að auknar álögur ríkisins ofan á laun eru þeim mun meira íþyngjandi fyrir reksturinn,“ segir Davíð í leiðaranum.

„Niðurstaðan er því sú,“ skrifar Davíð, „…að þeir skattar sem einstaklingar greiða beint eru mun hærri nú en þeir voru áður en vinstrimenn hrintu draumum sínum í framkvæmd í stjórnarráðinu og kerfið er flóknara að auki.“ Og þarna er bent á, með óvenju penum hætti að vísu, að hægri stjórnirnar tvær hafi ekkert gert til að breyta skattastefnu vinstri stjórnarinnar.

„Til að heimilin geti búið við bætt kjör verða fyrirtækin í landinu að geta staðið undir hærri launagreiðslum. Vaxandi verðmætasköpun og kjarabætur almennings verða ekki til úr engu og ekki án öflugra fyrirtækja,“ áréttar Davíð rétt einsog hann hefur gert nú í nokkur ár.

Skilaboðin eru skýr. „Vinstristjórninni fylgdu stöðugar skattahækkanir og því miður hefur lítið verið gert síðan til að vinda ofan af álögunum og jafnvel verið bætt í á sumum sviðum.“

Samkvæmt samantekt Davíðs Oddssonar er ekki í mörg hús að venda fyrir það fólk sem berst gegn háum sköttum. Ráðherrar ríkisstjórnar Bjarna Benediktssonar hafa talað fyrir miklum skattahækkunum, nýjum vegasköttum, hærri sköttum á bensín, áfengi og hækkandi virðisaukaskatti á gistingar og margt fleira.

-sme




Booking.com