Hamfarir í Sjálfstæðisflokki

Leiðari Sjálfstæðisflokkurinn leikur á reiðiskjálfi. Fólkið í flokknum er hvorki einróma né eintóna. Þingmenn flokksins hafa skilað sér hver á sinn bás og bíða þar til formaðurinn kinkar kolli og klappa þegar hann segir. Það á ekki við um allt fólk í flokknum.

Bjarni Benediktsson lætur sem hann sé þeirrar skoðunar að uppljóstranir gærdagsins hafi ekki áhrif. Þegar Morgunblaðið leitaði til hans, vegna mælinga á umtalsverðu fylgistapi flokksins, segist hann ekki telja að það hafi neitt með stöðu sína og uppljóstranirnar að gera.

Engum öðrum dylst að Bjarna er mikill vandi á höndum. Jafnvel er komið að þeim krossgötum í Sjálfstæðisflokknum að fólki þyki nóg komið og að staða formannsins sem umfangsmikils fjárfestis og staða hans í stjórnmálum samræmist engan veginn, hið minnsta mjög illa.

Það fólk sem starfar mest með Bjarna mun frekar ganga með honum dauðagöngu en reyna að vekja athygli hans á hvert stefnir. Utan Valhallar er hinn almenni flokksmaður. Hið raunverulega bakland Sjálfstæðisflokksins. Meiri flótti er brostinn á í þeim hópi en áður.

Þú gætir haft áhuga á þessum

Núna er ekkert sem bendir til eða segir að Sjálfstæðisflokkurinn nái að endurheimta fyrri stöðu sína. Þess í stað bendir allt til að staða flokksins fari versnandi. Aðeins er spurt hversu merðvirkur getur einn stjórnmálaflokkur verið. Fyrir Sjálfstæðisflokkinn er þetta dauðans alvara.

Sigurjón M. Egilsson.




Booking.com

Tengdar fréttir sem þú gætir haft áhuga á að lesa: