Höfum stórhækkað lífeyrisgreiðslur

Bjarni Benediktsson segir eðlilegt að þau sem minnst hafa borgi skatta, tekjurnar þeirra hafi aukist stórlega.

„Okkur hefur tekist að stórhækka lífeyrisgreiðslur, hvort sem er ellilífeyri og örorkulífeyri, á undanförnum árum og reyndar er það svo, og það ætti ekki að dyljast neinum, að ef við skoðum síðustu fimm árin og síðan aftur fjármálaáætlunina sem liggur fyrir þinginu er verið að forgangsraða í þágu hærri greiðslna,“ sagði Bjarni Benediktsson, formaður Sjálfstæðisflokksins á Alþingi, þegar hann svaraði Guðmundi Inga Kristinssyni, þingmanni Flokks fólksins.

Guðmundur Ingi: „…hættum að skatta fátækt fólk, hvað þá sárafátækt…“

„Það er þjóðarskömm“

Guðmundur Ingi sagði: „Ég spyr því ráðherra hvort honum finnist það ekki eðlilegt að við á okkar háu launum afsölum okkur persónuafslætti til þess að koma hinum sem þurfa á honum að halda, láglaunafólki sem er með 300 þús. kr., 220 þús. útborgað, og skattað, að það fái þennan persónuafslátt. Við eigum að sjá til þess að fólk geti lifað hérna með reisn. Við erum með veikt fólk, við erum með eldri borgara sem eiga ekki fyrir mat, lyfjum og öðrum hlutum en á sama tíma erum við að skammta okkur góð laun og sleppa því að sjá til þess að fólk sem hefur ekki til hnífs og skeiðar sé ekki skattað. Við verðum að setja hlutina þannig fram að við hættum að skatta fátækt fólk, hvað þá sárafátækt, vegna þess að það er þjóðarskömm.“

Þú gætir haft áhuga á þessum

Þeir sem þéna mest borga flestar krónurnar

Bjarni sagði einnig: „Verið hefur mikið í umræðunni að undanförnu að lægri tekjutíundirnar hafi á undanförnum árum fengið hærri skattbyrði. Ástæðan fyrir því er fyrst og fremst sú að tekjur þessara tekjutíunda hafa verið að aukast stórlega. Þá er eðlilegt að spurt sé: Ættum við að leggja hærri skatta á millitekju- og hátekjufólkið til að geta létt af sköttum á lægri tekjur? Svar mitt við þeirri spurningu er í fyrsta lagi: Við erum þegar með kerfi í dag, eins og háttvirtur þingmaður vék að, sem tekur mun lægri skattprósentu af lægri tekjum en efri tekjum. Þeir sem eru með hæstu tekjurnar borga flestar krónurnar og hæsta hlutfallið, þeir sem eru með lægstu tekjurnar borga fæstar krónurnar og lægsta hlutfallið. Ég vil halda áfram að létta á skattbyrði. Ég tel að það þurfi ekki að hækka skatta á ákveðna hópa til þess að lækka þá á öðrum, heldur eigum við einfaldlega að nota það hagvaxtarskeið sem við erum á í dag til að lækka skatta almennt. Við erum að gera ráð fyrir svigrúmi til þess í fjármálaáætluninni og höfum boðað aðgerðir á haustmánuðum.“




Booking.com

Tengdar fréttir sem þú gætir haft áhuga á að lesa: