Sjáðu stikluna úr heimildarmynd um Heath Ledger heitinn
Þann 3. maí næstkomandi kemur út heimildarmynd um hinn ástsæla leikara Heath Ledger sem lést langt um aldur fram frá barnungri dóttur sinni
Ný heimildarmynd um Heath Ledger heitinn kemur út 3. maí næstkomandi og nú er búið að gefa út sýnishorn af því sem koma skal. Í myndinni munu vera áður óséð myndbönd sem koma úr safni Heath sjálfs ásamt því að innihalda viðtöl við einstaklinga sem þekktu vel til þessa ástsæla leikara og má þar sem dæmi nefna Naomi Watts leikkonu, Ben Mendelsohn leikara, leikstjórann Ang Lee og svo að sjálfsögðu ættingja hans og vini.
Haft var eftir Trevor DiCarlo, æskuvini Heath, að fyrst og fremst hafi hann verið leikstjóri og að hlutverk hans sem leikari hafi aðeins verið til að komast þangað. Undir þetta tekur módelið Christina Cauchi og bætir við að hans sé ávallt minnst með myndavél í hönd, annað hvort upptökuvél, venjulega myndavél eða Polaroid myndavél.
Hér má sjá stikluna: