Svandís Svavarsdóttir heilbrigðisráðherra var vakin með látum þegar ljósmæður, sem sinna þjónustu í heimahúsum sögðu margar hverjar upp og bentu á ráðherrann. Sögðu Svandísi hafa legið á hugsanlegri lausn deilu þeirra og ríkisins og hafa gert frá því um páska.
„Því er rangt að segja að samningur hafi legið á mínu borði og beðið staðfestingar eins og staðhæft hefur verið í fjölmiðlum,“ sagði Svandís á Alþingi í dag. Ljóst er að Svandís er komin á fætur og virðist ætla að láta hendur loks standa fram úr ermum.
„Í dag hefur gefist ráðrúm til að funda með Sjúkratryggingum Íslands.“ Og …“sá fundur gekk vel og er áformað að ráðuneytið og Sjúkratryggingar hittist aftur á morgun kl. 14,“ sagði Svandís einnig.
„Þetta hefur legið inni á borði hjá henni síðan fyrir páska og ekkert hefur heyrst. Við sendum henni margar skilaboð í gær um að við ætluðum í þessar aðgerðir. Það er ekki rétt sem hún segir að þetta komi á óvart því hún hafi ekki heyrt neitt fyrr en í fjölmiðlum.“ Þetta sagði Ellen Bára Valgerðardóttir, ljósmóðir á Landspítala og sjálfstætt starfandi ljósmóðir í heimaþjónustu, á mbl.is. Þar segir og að í gær var greint frá því að 60 ljósmæður sem sinna heimaþjónustu myndu leggja niður störf í dag en nú er ljóst að allar 95 sem skráðar eru í kerfi heimaljósmæðra leggja niður störf.
Svandís sagði einnig að í ljósi stöðunnar hafi hún nú þegar skrifað bréf til allra heilbrigðisstofnana landsins með tilmælum um að þær annist umrædda þjónustu þar til lausn hefur fundist á stöðunni. „Það er á ábyrgð heilbrigðisstofnana að tryggja öryggi mæðra og barna og að nýburar og sængurkonur líði ekki fyrir þá stöðu sem upp er komin.“
