- Advertisement -

Tekist á um arðgreiðslur Orkuveitunnar

Minnihlutinn vill frekar að OR greiði niður skuldir en borga arð til eigenda, eða þá að lækka gjaldskrár.

Fjárhagsspá Orkuveitunnar gefur fyrirheit um nærri 14 milljarða arðgreiðslur til eigenda á næstu sex árum, segja borgarfulltrúar Sjálfstæðisflokks, Miðflokks og Flokks fólksins.

„Við teljum rétt að Orkuveitan leggi áherslu á kjarnastarfsemi og hverfi frá arðgreiðsluáformum. Svigrúm í rekstri Orkuveitunnar ætti mun fremur að nýta til niðurgreiðslu skulda, fjárfestingar í innviðum og lækkunar þjónustugjalda. Samkvæmt eigendastefnu á Orkuveita Reykjavíkur að bjóða viðskiptavinum þjónustu á sanngjörnu og samkeppnishæfu verði. Við teljum rétt að horfið verði frá arðgreiðsluáformum og þjónustugjöld lækkuð. Þannig mætti færa Orkuveitu Reykjavíkur nær sínu réttilega hlutverki sem orkufyrirtæki í almannaeigu.“

Þessu svöruðu fulltrúar meirihlutans:

„Í bókun Sjálfstæðisflokks kemur fram sú skoðun að hafna eigi arðgreiðslum en nýta frekar fjármagnið til að lækka gjaldskrár til þeirra sem nota þjónustu félagsins. Arðgreiðslurnar má rekja til mikilla eigna sem íbúar í Reykjavík hafa fyrst og fremst lagt til félagsins auk þeirra björgunaraðgerða sem ákveðnar voru 2011 og námu tæpum 12 milljörðum. Það er ekki óeðlilegt að arðgreiðslurnar skili sér þess vegna í borgarsjóð til að fjármagna bætta þjónustu og fjárfestingar og draga úr lántökuþörf borgarinnar í stað þess að dreifa arðinum á alla notendur þjónustunnar sem eru flest sveitarfélög á höfuðborgarsvæðinu.“

Þú gætir haft áhuga á þessum

Þá svaraði minnihlutinn:

„Í bókun „meirihlutans“ segir: „Arðgreiðslurnar má rekja til mikilla eigna sem íbúar í Reykjavík hafa fyrst og fremst lagt til félagsins“. Þetta er undarlegt. Ekki er ljóst til hvað eigna er vísað, en íbúar hafa fyrst og fremst greitt hærra verð fyrir rafmagn, heitt vatn og fráveitu. Þessar tekjur eru aðalgrunnur þess hagnaðar sem Orkuveitan hefur sýnt. Í stað þess að greiða út milljarða arð í borgarsjóð væri unnt að lækka orkureikning heimilanna.“

Og meirihlutinn átti síðasta orðið:

„Góður árangur í rekstri Orkuveitunnar byggir á miklu aðhaldi í rekstri, fjárfestingum og öðrum þáttum, en aðeins að litlu leyti á breytingum á gjaldskrám. Með vænkandi hag hafa gjaldskrár verið lækkaðar.“




Booking.com

Tengdar fréttir sem þú gætir haft áhuga á að lesa: