- Advertisement -

Þinn tími er liðinn, Bjarni. Og þá líka þinn, Katrín.

Í september 2014 var þingfararkaup 651.445 kr. eða um 701.110 kr. á núvirði. Í dag er þingfarakaupið 1.101.194 kr. Þetta er 57% hækkun umfram verðlag. Í krónum eru þetta nýjar 400 þús. kr. á mánuði. Hið rétta er að svigrúm til sjálftöku auðvalds og elítu er löngu uppurið.

Gunnar Smári Egilsson.

Okei, Bjarni Ben segir að svigrúm til launahækkana hafi klárast akkúrat þegar hann og ráðherrarnir voru búnir að fá myndalega hækkun frá klíkubræðrum sínum í Kjararáði. En hvert er svigrúmið? Hvað hefur gerst undanfarin ár í rekstri fyrirtækja?

Tökum dæmi af Kynnisferðum, en það er opinbert leyndarmál að móðir Bjarna haldi á hlut hans í fjölskyldufélagi þeirra Engeyinga, Alfa, aðaleiganda Kynnisferða, meðan Bjarni sinnir erindum hinna ríku í stjórnmálum.

Helsta gullegg Kynnisferða er flugrútan til Keflavíkur. Í september 2014 kostaði leiðin til Keflavíkur fram og til baka 3.500 kr. eða 3.767 kr. á verðlagi dagsins. Í dag kostar 5.500 kr. að fara fram og til baka með flugrútunni til Keflavíkur. Á föstu verðlagi er hækkunin 46% umfram verðlag.

Þú gætir haft áhuga á þessum

Í september 2014 kostaði bensínlítrinn (dísil sveiflast eins) kr. 228 eða kr. 245 á núvirði, en kostar í dag kr. 220. Þetta er raunlækkun upp á 10%.

Í september 2014 var launavísitalan 490,6 en er í dag 660,9. Þetta er hækkun upp á 35% – en að teknu tilliti til verðlags jafngildir þetta 25% raunhækkun.

Líklega er launakostnaður það sem hefur hækkað mest á Íslandi frá 2014, enda lágu laun þá enn niðri í skítnum eftir kjaraskerðinguna miklu í kjölfar Hrunsins (sem rekja má meðal annars til starfsemi Glitnis, þar sem Engeyingar voru ráðandi eigendur, mikið í að lána sjálfum sér). En hækkun launa hefur lagst misjafnlega í stéttir. Í september 2014 var þingfararkaup 651.445 kr. eða um 701.110 kr. á núvirði. Í dag er þingfarakaupið 1.101.194 kr. Þetta er 57% hækkun umfram verðlag. Í krónum eru þetta nýjar 400 þús. kr. á mánuði á meðan bílstjóri með 350 þús. kr. á mánuði hefur fengið nýjar 70 þús. kr. í umslagið miðað við september 2014. Þingmenn hafa fengið næstum sex sinnum meira en bílstjórinn. Í september voru þingmenn með 2,5 sinnum meira í laun en bílstjórinn, en í dag eru þeir með 3,1 sinnum meira. Það er niðurstaða Hrunsins: Við viljum hækka laun þingmanna og ráðherra!

Á sama tíma rukka Bjarni og fjölskyldan 46% meira fyrir rútuferðina, en borga starfsfólkinu aðeins 25% meira í laun og greiða 10% minna fyrir eldsneytið. Þeir hækka gjaldið á kúnnann til að geta greitt sjálfum sér meira.

Bjarni segir (og Katrín Jakobsdóttir endurtekur það sem páfagaukur) að svigrúmið til launahækkana sé búið. Hið rétta er að svigrúm til sjálftöku auðvalds og elítu er löngu uppurið. Þetta lið hefur gengið of langt. Við getum ekki haldið því lengur uppi. Það verður að höggva niður sjálftöku og okur eigenda fyrirtækjanna og stjórnmálaelítan verður að lækka laun sín, fara niður til lífskjara yfirkennara eða þar um bil. Stjórnmálafólk á ekki að vera á launum eins og forstjórar eða millistjórnendur í arðránsfyrirtækjum. Svigrúm yfirstéttarinnar, auðvaldsins og elítunnar er búið. Almenningur er risinn upp. Þinn tími er liðinn, Bjarni. Og þá líka þinn, Katrín.

Gunnar Smári Egilsson.


Booking.com

Tengdar fréttir sem þú gætir haft áhuga á að lesa: