Engir kærleikar eru með þeim Degi B. Eggertssyni og Eyþóri Arnalds.
Eyþór skrifar um Dag og segir borgarstjóra koma á óvart í orðaleikfimi.
„Í stað þess að ræða málefnalega um hagræðing í dýru og óskilvirku stjórnkerfi borgarinnar fer hann víða í flæmingi og gerist hneykslaður fyrir hönd starfsmanna borgarinnar.
Borgarstjóri diktar upp atvik og hneykslast á þeim.
Vitnar ranglega í skýrslur og hvernig staðið var að ákvörðunum.
Allt gert í stað þess að viðurkenna vandann þegar fyrir liggur:
Dómur Héraðsdóms um skrifstofu borgarstjóra.
Niðurstaða úrskurðarnefndar jafnréttismála í ólöglegri ráðningu borgarlögmanns.
Tvö álit Umboðsmanns Alþingis um húsnæðismál borgarinnar en því fyrra var ekki brugðist við í tvö ár.
Erindi frá Kjarafélagi Viðskipta- og hagfræðinga um starfsmannamál á skrifstofu borgarstjóra.
Og kvartanir Umboðsmanns borgarbúa um hve hægt gengur að fá svör.
Kannski virkar svona pólítík – vonandi ekki endalaust.“
Skrif Eyþórs lýsa kannski ágætlega hvert andrúmsloftið er í Ráðhúsi Reykjavíkur.
