- Advertisement -

35 manna aftökusveit Pírata rændi völdum

Aldrei hefur önnur eins breiðfylking látið til sín taka í íslenskum stjórnmálum.

Jóhann Þorvarðarson skrifar:

Það fór ekki mikið fyrir leiðarstefi Pírata um virkt lýðræði á átakafundi þar sem Birgitta var afhöfðuð í beinni. Tölvu- og nettækni hvergi sjáanleg til að ná til hinnar rómuðu grasrótar allt um landið. Rótin sem þingmenn Pírata og forseti borgarstjórnar segjast hlusta eftir. Hallelúja vinirnir símalandi yfir netið.

Þeir sem best þekkja til segja að þingflokkur Pírata og forsetinn, launuðu böðlarnir, hafi smalað inn á fundinn með eftirtektarverðum árangri. Heilar 66 manneskjur mættu. Ef tæknimaðurinn er undanskilinn sem ekkert hafði að gera voru 53 hræður á vegum böðlanna. Ef böðlarnir sjálfir ásamt mökum og skyldmennum eru dregnir frá þá eru þetta um 35 mannverur sem flykktust á fundinn. Aldrei hefur önnur eins breiðfylking látið til sín taka í íslenskum stjórnmálum.  Svo fjölmennt var að lítill gulur strætó með wifi tengingu hefði hentað undir verkið. Síðan hefði mátt kasta hræinu út á ferð svo lítið bæri á.   

Þú gætir haft áhuga á þessum

Illgresinu í grasagörðum landsins þurfti að eyða í einum hvelli.

Aðalböðullinn hann Helgi Hrafn þingmaður sem hatar einelti hertók ræðustólinn og hafði æruna af stofnanda Pírata á nýju ólympíumeti. Svo snöggur var hann að grunur er uppi um steranotkun. Beitti hann kunnuglegum brellum. Gaf ýmislegt í skyn, eins og Gróa á Leiti, en rökstuddi ekkert. Duflaði hárfínt við fundarmenn þannig að Birgitta átti aldrei séns. Svona virkar lýðræðið hjá Pírötum á ögurstundu, smala á fund, engin efnisumræðu og slátra óstýrilátum á nóinu.    

Í fundarboði sagði ekkert um að kjósa ætti sérstaklega milli einstaklinga í trúnaðarráðið. Venjan er að farið sé að tillögu framkvæmdaráðsins og þar með grasrótarinnar. En nei, aftökusveitin hafði annað í huga. Núna var það virkt ofstæki sem blívaði. Illgresinu í grasagörðum landsins þurfti að eyða í einum hvelli.

Já, kasti sá fyrsta steininum sem syndlaus er. Forysta Pírata er með þetta á tæru og gengur um með dýrlingabaug.

Aftur kemur mér eftirfarandi vísa í hug:

 Vondra róg ei varast má

Varúð þó menn beiti

Mörg er Gróa málug á

Mannorðsþjófa Leiti.


Booking.com

Tengdar fréttir sem þú gætir haft áhuga á að lesa: