- Advertisement -

Ríkisstjórn Katrínar og fátækasta fólkið

Katrín Jakobsdóttir:
Ég vil nefna breytingar á skattkerfi sem skila skattalækkunum fyrst og fremst til tekjulægstu hópanna.

„25.000 milljónir tókst Samtökum atvinnulífsins að kreista út með krókódílatárum. Á sama tíma voru 25 milljónir að skila sér í mataraðstoð. Á sama tíma þurftu 50 manns frá að hverfa og fengu enga mataraðstoð. Á sama tíma er fólk heima eftir tíu daga í mánuðinum matarlaust og getur ekki einu sinni farið í raðir. Ég spyr hæstvirtan forsætisráðherra: Er ekki kominn tími til að segja við þessa einstaklinga að þeirra tími sé kominn og þau eigi ekki að bíða lengur,“ sagði Guðmundur Ingi Kristinsson, Flokki fólksins á Alþingi, í morgun. Þetta var fyrri fyrirspurn hans til Katrínar Jakobsdóttur forsætisráðherra.

Katrín svaraði meðal annars svona:

„Ég vil nefna barnabætur. Ég vil nefna breytingar á skattkerfi sem skila skattalækkunum fyrst og fremst til tekjulægstu hópanna. Ég vil nefna greiðsluþátttöku í heilbrigðiskerfinu sem við ræddum hér árum saman og höfum núna tekið stór skref til að draga úr kostnaði sjúklinga í heilbrigðiskerfinu, sérstaklega með áherslu á örorkulífeyrisþega og aldraða. Tannlæknakostnaðurinn sem hafði ekki verið endurskoðaður síðan 2004, þar var loksins gripið til aðgerða. Síðan vil ég nefna það síðasta sem lýtur að öldruðum, þ.e. nýjan viðbótarstuðning til þeirra sem höllustum fæti standa í þeirra hópi.“

Guðmundur Ingi kom aftur í ræðustól:

„Það er rétt sem hún segir, en staðreyndin blasir við: Fólk borðar ekkert fyrir þetta, það er jafn svangt og fær eftir sem áður neitun í biðröð eftir mat. Það er jafn slæmt að vera heima þegar það á ekki mat í ísskápnum. Ég spyr og hæstvirtur ráðherra hefur ekki svarað því enn: Hvers vegna í ósköpunum er þetta eini hópurinn sem fær ekki lífskjarasamninga? Hvers vegna í ósköpunum er hægt að verja lífskjarasamningana með kjafti og klóm og láta Samtök atvinnulífsins fá ótakmarkaða peninga en ekki hægt að setja krónu til þessa hóps?“

Katrín steig á ný í ræðustól Alþingis. Hún var ekki sátt við allt sem Guðmundur Ingi hafði sagt. Til dæmis sagði hún:

„Telur háttvirtur þingmaður að þetta snúist um einhverja aðila sem starfa hjá Samtökum atvinnulífsins? Það er nefnilega ekki þannig.“


Tengdar fréttir sem þú gætir haft áhuga á að lesa: