- Advertisement -

Aðeins um uppspuna Halls Hallssonar

Skáldið segir Sjálfstæðisflokkinn hafa komið Íslandi í A plús flokk.

Jóhann Þorvarðarson skrifar:

Hallur Hallsson fjölmiðlamaður ybbar rokkna gogg í grein í Mogganum 4. maí. Nei, hann rífur rosakjaft. Nei, þetta er ekki alveg rétt hjá mér. Maðurinn drullar algjörlega yfir þjóðina. Orðið uppspuni lýsir vel greininni. Staðleysurnar eru svo margar að halda má að sannleikurinn sé óværa í huga hins roskna fjölmiðlamanns. 

Greinin er svo döpur að Moggann setur niður fyrir skolplagnir að birta bullið í manninum. Hefði verið betra ef blaðið hefði birt greinina undir liðnum menning þar sem skáldskapur er á ferðinni.

Þú gætir haft áhuga á þessum
Hallur Hallsson.

Stiklað skal á nokkrum staðleysum án þess að þreyta lesandann um of á bullinu í Halli:

1. Skáldið segir að hjarta Sjálfstæðisflokksins hafi slegið takt með þjóðinni þar til fyrir 10 árum. Hann er væntanlega að vísa til þess þegar flokkurinn einkavæddi bankana og afhenti þá óvitum sem ollu hruninu. Þarna sýndir flokkurinn sitt hjartalag, hrein guðsgjöf til landans að mati Halls.

2. Skáldið slær sér á brjóst og segist hafa verið í fylkingarbrjósti eftir hrunið í baráttu gegn Icesave. Hann var sko pungsveittur við björgunarstörf. Segir bláa flokkinn hafa síðan bilað í trúnni og bugtað sig fyrir einhverjum ímynduðum óvin sem hann kallar samfóista sem anga af skítalykt. Stórskáldið hefur augljóslega leitt það alveg hjá sér að hvergi hefur efnahagsbati verið eins skjótur og langvarandi eftir hrun og á Íslandi. Semsagt, fólkið með skítalyktina í hans eigin flokki á engar þakkir inni hjá stórskáldinu.

3. Skáldið segir bláa flokkinn ekki lengur stýra þjóðarskútunni. Í öllum ríkisstjórnum frá hruni, fyrir utan þá fyrstu, þá hefur Sjálfstæðisflokkurinn haft öll undirtök eins og ráðherraskipan edurspeglar hverju sinni. Án rökstuðnings eða dæma segir spunameistarinn að skítalyktandi samfylkingarfólk stjórna ferð bláu handarinnar í orkumálum.

4.  Skáldið segir ráðandi aðila í Sjálfstæðisflokknum fremja pólitískt harakirí með samþykkt orkupakka 3 og það muni enda illa. Nei, ekki illa heldur afar, afar afar illa svo ég noti orð spunameistarans. Verst er að engin rök eru sett fram sem styðja gífuryrðin fyrir utan ósannindi. Ef samþykkt orkupakka 3 er harakirí í huga stórskáldsins þá hefur orðið fengið alveg splunkunýja meiningu.

5.  Skáldið segir Sjálfstæðisflokkinn hafa komið Íslandi í A plús flokk. Já, það sást vel í hruninu þegar landið var flokkað í ruslflokk á fjármálamörkuðum.

6. Skáldið segir bláa flokkinn haf leitt landið upp úr hruninu. Flokkur sem var ekki í ríkisstjórn fyrstu fjögur árin eftir hrun. Alveg stórkostleg fullyrðing.

7.  Skáldið eignar Sjálfstæðisflokknum sjálfstæði Íslands, er ein af einkaeigum flokksins. Hér skiptir engu þó að samnefnari íslenskrar sjálfstæðisbaráttu, Jón Sigurðsson, hafi dáið árið 1879 eða 50 árum áður en Sjálfstæðisflokkurinn var stofnaður. Flokkurinn á einnig heiðurinn af fullveldinu að mati skáldsins sem fékkst árið 1918 eða 11 árum fyrir stofnun bláa flokksins. Já, margur vildi Lilju kveðið hafa og skreyta sig með stolnum fjöðrum.  

Hinn einstaki Hallur Hallsson er ekki aðdáandi sannleikans. Ekki frekar en þegar hann með einstökum fréttaflutningi reyndi að hafa æruna af Eðvaldi Hinrikssyni, föður íþróttahetjanna Jóhannesar og Atla. Hallur gat aldrei fært sönnur fyrir neinu öðru en að Eðvald væri frá Eistlandi. Margir landsmenn muna þessa fólskulegu árás. Þar opinberaði Hallur sinn innri mann. Hann gerir það aftur núna með leirburði dagsins!


Booking.com

Auglýsing

Tengdar fréttir sem þú gætir haft áhuga á að lesa: