Jóhann Þorvarðarson:
Skaðinn af hinum mikla mun mælist í hundruðum milljarða króna og það eru ekki bara heimilin sem finna fyrir skakkaföllunum heldur einnig ríkissjóður.
Síðan í ágúst árið 2019 þá er uppsöfnuð verðbólga á Íslandi 22,8 prósentustig á sama tíma og uppsöfnunin er 14 stig í Danmörku, en frændur okkar binda eigin gjaldmiðil með rembihnút við evruna. Munurinn er 63 prósent og endurspeglar afar slaka peningamálastjórn á Íslandi. Þá verstu hjá löndum sem við viljum bera okkur saman við. Ef við jöfnum þetta á ársgrundvöll þá er verðbólga á Íslandi að jafnaði 6 prósent á ári á meðan hún er 3,8 prósent í Danmörku.
Ábyrgðin á slöku gengi Íslands er rakin beint til Vinstri grænna, en Katrín Jakobsdóttir hefur alfarið farið með skipun í æðstu embætti bankans. Skaðinn af hinum mikla mun mælist í hundruðum milljarða króna og það eru ekki bara heimilin sem finna fyrir skakkaföllunum heldur einnig ríkissjóður. Hann þarf einnig að borga hærri vexti á sína skuldir, sem leiðir núna til niðurskurðar. Minna mun fara til samfélagsmála: heilbrigði, menntun og samgöngumál.
Óstöðugleikinn á Íslandi er sem ruggubátur þar sem lunningin veitir lítið skjól og æ meiri sjór safnast fyrir innanborðs. Róðurinn þyngist á sama tíma og Danir sigla nokkuð lygnan sjó. Þetta er getumunurinn á Katrínu Jakobsdóttur og Mette Frederiksen.