Jóhann Þorvarðarson skrifar:
Á sama tíma hefur heldur ekki fengist svar við spurningunni hvort meintur hvítþvottur hafi verið ein af ástæðum þess að Bretar beittu hryðjuverkalögum á Íslandi. Nauðsynlegt er að fá svör við spurningunum enda um grafalvarleg mál að ræða.
Hinn árlegi leikþáttur er kominn á fjalirnar og fer fjármálaráðherra venju samkvæmt með aðalhlutverkið. Í þættinum segir að ríkisstjórnin sé á áætlun með sína hluti.
Þetta er alveg rétt enda stefnir í að villti íslenski laxastofninn verði útdauður vegna óstjórnar og græðgi. Ósnert víðerni miðhálendis Íslands sætir síðan árás frá græðgisöflum með dyggum stuðningi frá Vinstri grænum.
Vatnsauðlindir í Ölfusi eru að komast í hendur asískra fjárfesta samkvæmt áætlun ríkisstjórnarinnar enda komu Sjálfstæðisflokkur og Framsókn í veg fyrir að lögfesta nýju stjórnarskrána. Skrá sem þjóðin hefur sjálf valið sér og hefði tryggt að vatnsauðlindir Íslands væru þjóðareign.
Uppsöfnuð verðbólga á síðustu 6 árum er því komin í tæp 30 prósent.
Vextir eru hvergi eins háir í kringum okkur og á Íslandi og verðbólga stefnir aftur á 10 prósentin. Uppsöfnuð verðbólga á síðustu 6 árum er því komin í tæp 30 prósent. Þetta er allt samkvæmt áætlun og best að státa sér af árangrinum. Fagna um leið að verðtryggingin öðlist nýtt tangarhald á heimilum og fyrirtækjum landsins.
Sem betur fer þá hrynur fylgið af Stjórnarflokkunum og von er á því að Íslendingar fái loks að kynnast raunverulegu frelsi, þar með talið samkeppnisfrelsi. Og mögulega fáum við tímabæra rannsókn á því hvort Rannsóknarnefnd Alþingis hafi velt við hverjum steini um hvað í raun og veru gekk á fyrir fjármálahrunið á Íslandi. Uppi er nefnilega nýtilkominn rökstuddur grunur um að svo hafi ekki verið. Nefndin er sögð hafa gengið fram hjá steinum vegna hótana innlendra og erlendra afla.
Aldrei hefur til dæmis tekist að kveða í kútinn meintan hvítþvott íslenskra banka á óhreinu taui frá Rússlandi. Gunnar Tómasson birti á sínum tíma þýðingu á grein eftir Dr. Gary K. Busch, samanber hér, þar sem fjallað er um meintan hvítþvottinn. Nýlega voru mér síðan sýndar trúverðugar upplýsingar sem styðja þann grun að Rannsóknarnefnd Alþingis hafi fengið upplýsingar í hendur erlendis frá er styðja við þann grun að illa fengið fé frá Rússlandi hafi verið hvítþvegið í þvottavélum einkavæddu bankanna á sínum tíma. Nefndin ákvað af óútskýrðum ástæðum að aðhafast ekkert. Öll málsgögn nefndarinnar eru lokuð almenningi.
Á sama tíma hefur heldur ekki fengist svar við spurningunni hvort meintur hvítþvottur hafi verið ein af ástæðum þess að Bretar beittu hryðjuverkalögum á Íslandi. Nauðsynlegt er að fá svör við spurningunum enda um grafalvarleg mál að ræða.