- Advertisement -

Alveg drepfyndinn þessi nýi seðlabankastjóri!

Þið munið, bankinn sem gaf út ástarbréfin og síðan allan gjaldeyrisforðann til Kaupþings.

Jóhann Þorvarðarson skrifar:

Þið munið hann Ásgeir sem var aðalhagfræðingur Kaupþings fyrir hrun. Þekktur fyrir uppistönd þegar hann spáði góðu gengi bankans aftur og aftur og aftur og alveg fram í hrun. Katrín forsætisráðherra taldi tími kominn á meira grín frá þessum Ladda fjármálanna. Núna er hann aðal í seðlabankanum.

Uppistandarinn var ekkert að tvínóna við endurkomuna. Lauk fyrsta starfsdegi sínum með nýju innslagi í Kastljósi. Hann fór rólega af stað, var svona að lesa salinn, en svo kom bomba. Hann sagði ; „ég hef aldrei talað gegn betri vitund“. Þessi var svo góður að ég fékk krampa sem endaði með hlægjuhósta.

Þú gætir haft áhuga á þessum

Úff, hvað þetta var skemmtileg innkoma hjá okkar manni.

Það hefur nefnilega hvergi gleymst þegar gervallur fjármálamarkaður heimsins var búinn að afskrifa íslensku bankana í ágúst 2008. Enginn vildi eiga viðskipti við þá nema auðvitað íslenski seðlabankinn sem var stjórnað af öðrum spaugara. Þið munið, bankinn sem gaf út ástarbréfin og síðan allan gjaldeyrisforðann til Kaupþings. Í miðjum storminum birtist Ásgeir grínari alveg sallarólegur með sitt silkimjúka spádómsskegg. Sagði heiminn hafa rangt fyrir sér. Þetta væri bara hystería. Þið þekkið framhaldið, hrunið! Þarna talaði hann af mikilli vitund að eigin sögn. Margir efast!

Úff, hvað þetta var skemmtileg innkoma hjá okkar manni. Í miðjum hóstanum hugsaði ég, ekki koma með annan strax. Bíddu með seinni bylgjuna. En þá kom Tsúnamíflóð frá okkar manni. Sagðist hann ekki hafa gert sér grein fyrir því á hversu veikum grunni Kaupþing stóð. Nú var mér öllum lokið og reif hláturinn alveg niður í, já þið vitið hvert.

Skoðaði maðurinn ekki gögn síns eigin atvinnurekanda áður en hann gaf út spár um virði hlutabréfa Kaupþings. Setti hann kannski bara rennblauta löngutöngina upp í loftið og gáði til veðurs áður en hann gaf út sitt skjal og skrum?

Hér er játning komin fram sem örugglega margir vilja skoða betur. Sérstaklega fjölskyldurnar sem töpuðu öllu og flosnuðu upp. Allt í boði uppistandarans, en fjölskyldurnar sáu bara ekki í gegnum grínið! Tóku hann alvarlega. Það var líka í síðasta sinn hjá öllum nema Katrínu.

Ég tek nú bara undir með Geir Haarde, Guð blessi Ísland! Og ég meina′ða, gat Katrín ekki bara spilað plötuna „Látum sem ekkert C“ og hlíft þjóðinni?


Booking.com

Tengdar fréttir sem þú gætir haft áhuga á að lesa: