„…þetta stóran þátt í hve efnahagur ESB-ríkjanna hefur gefið eftir miðað við önnur ríki, svo sem Bandaríkin og Ísland.“
Reykjavíkurbréf Moggans.
Reykjavíkurbréf Mogga morgundagsins er að mestu um 250 ára afmæli Bandaríkjanna. Samt er Evrópusambandið senuþjófur í lofgjörðinni um afmælisbarnið sjálft. Mikið fer fyrir ESB í bréfinu. Og alls ekki að góðu einu. Hér fer kafli úr sunnudagsskrifunum:
„Barátta Bandaríkjanna fyrir sjálfstæði og lýðræði er athyglisverð fyrir margra hluta sakir. Nefna má að upp úr þessari baráttu varð til öflugasta ríki heims á marga mælikvarða og afl þess réð til að mynda úrslitum í báðum heimsstyrjöldum síðustu aldar. Án þátttöku Bandaríkjanna í þeirri síðari er alls óvíst hvernig heimurinn liti út í dag og hvort lýðræði væri til að mynda reglan í ríkjum Evrópu.
Evrópusambandið er ekki heldur til fyrirmyndar…
Efnahagslegur kraftur Bandaríkjanna, sem hefur verið grundvöllur hernaðarmáttarins, hefur verið gríðarlegur í rúma öld og mun öflugri en til að mynda í Evrópu, eða öllu heldur innan Evrópusambandsins, þar sem hagvöxtur hefur verið rýr að undanförnu og framleiðslufyrirtæki hafa gefið eftir í samkeppninni án þess að nýjar greinar hafi fyllt í skarðið. Þessi þróun er verulegt áhyggjuefni fyrir ríki Evrópusambandsins, en Bandaríkin standa mun betur að þessu leyti þó að hörð samkeppni við Kína til að mynda leyni sér ekki þar heldur.
Núverandi stjórnvöld í Bandaríkjunum hafa viljað bregðast við þessu með háum tollum líkt og gert var fyrr á síðustu öld, en árangur af slíkum aðgerðum hefur alla jafna ekki verið góður. Frelsi í viðskiptum er almennt líklegra til árangurs eins og sjá má þegar bornar eru saman þjóðir sem búa við viðskiptafrelsi og hinar sem gera það ekki.
Evrópusambandið er ekki heldur til fyrirmyndar þegar kemur að frelsi í viðskiptum og margvíslegar viðskiptahömlur þess, meðal annars tæknilegar, hafa orðið stjórnvöldum í Bandaríkjunum tilefni til að leggja tolla á vörur þaðan. Staðreyndin er sú að það má þvælast fyrir frjálsum viðskiptum með ýmsum hætti og Evrópusambandið hefur gengið langt í tæknilegum hindrunum ofan á ytri tollamúra og á þetta stóran þátt í hve efnahagur ESB-ríkjanna hefur gefið eftir miðað við önnur ríki, svo sem Bandaríkin og Ísland.“
