Jóhann Þorvarðarson skrifar:
Halldór Benjamín vinnur einfaldlega við að rjúfa samstöðuna og væri rétt að setja Samtökin á válista.
En hverjir eru það sem frekjast svona áfram?
Það eru örfáir aðilar sem tala stöðugt gegn hagsmunum þjóðarinnar á kóvít-19 tímum. Tjá sig út frá smáum sérhagsmunum ferðaþjónustunnar, sem telur líkast til ekki nema fimm prósent landsframleiðslunnar í dag. Umboðslausum og óábyrgum aðilum hefur orðið ágengt með hræðsluáróðri og yfirgangi vegna ístöðuleysis Vinstri grænna og Framsóknarflokks gagnvart Sjálfstæðisflokki í ríkisstjórn. Flokkarnir hafa látið hina visnandi bláu hönd ráðskast með sig.
Viðurkennt er að ýmis starfsemi í landinu önnur en ferðaþjónusta höktir eftir góðan gang áður en deltaveirunni var leyft að ferðast óhindrað til landsins. Hikstið mun mögulega gera meira en að núlla út ávinninginn af glórulausri þjónkun við ferðaþjónustuna. Þjónkunin gæti því breyst í bjarnargreiða. En hverjir eru það sem frekjast svona áfram?
Þetta er fámennur hópur sem sækir ekkert umboð til landsmanna, en er tilbúið að tefla heilsu og efnahag þjóðarinnar í tvísýnu.
Fremst í flokki fara Jóhannes Þór Skúlason og Bjarnheiður Hallsdóttir frá Samtökum fyrirtækja í ferðaþjónustu. Halldór Benjamín Þorbergsson frá Samtökum atvinnulífsins er með þeim í liði og er hávær. Þessir aðilar fá síðan dyggan stuðning frá leigupenna Fréttablaðsins Herði Ægissyni. Blaði sem er í eigu Helga Magnússonar sem á ríkra persónulegra hagsmuna að gæta innan Bláa lónsins. Síðan eru það ritstjórar Morgunblaðsins þar sem finna má Davíð Oddsson, Harald Johannessen og Stefán Einar Stefánsson. Þetta er fámennur hópur sem sækir ekkert umboð til landsmanna, en er tilbúið að tefla heilsu og efnahag þjóðarinnar í tvísýnu. Ekki er spurt að leikslokum um áhrif deltaveirunnar og annarra afbrigða veirunnar.
Staða Halldórs Benjamíns er talin hafa veikst og var hún umdeild fyrir. Hann hefur barist fyrir þröngum sérhagsmunum ferðaþjónustunnar á kostnað félagsmanna sem starfa utan ferðaþjónustunnar. Taugaveiklun hefur gert vart við sig samanber yfirlýsing Samtakanna í gær. Krafist var tilslökunar á sóttvörnum þrátt fyrir að niðurrif sóttvarnargirðinga hafi valdið miklum skaða. Halldór Benjamín vinnur einfaldlega við að rjúfa samstöðuna og væri rétt að setja Samtökin á válista.