Jóhann Þorvarðarson skrifar:
Og Vinstri græn er bara einsmáls flokkur og dinglar með svo lengi sem Katrín Jak og Svandís Svavars halda ráðherrastólum. Skítt með almannahagsmuni.
Áður er fjármálaráðherra var gerður að formanni Sjálfstæðisflokksins þá þurfti að tukta hann fyrst til. Hann hefur nefnilega þá skynsömu skoðun að vilja taka upp evru á Íslandi. Á sama tíma vildu varðhundar sérhagsmuna innan flokksins ekki að almenningur og fyrirtæki fengi að búa við öruggan gjaldmiðil og viðvarandi lágan fjármagnskostnað. Skipti fjármálaráðherra þá í þykjustinni um skoðun. Svona eins og að hoppa í nýjar brækur. Út á við þá eru pólitísku skoðanir ráðherrans eins og hver annar vindhani, sem snýst eftir vindáttinni.
Nú talar fjármálaráðherra fyrir því að lífeyrissjóðum verði heimilt í auknu mæli að fjárfesta erlendis enda er það afar skynsamleg ráðstöfun. Lækkar bæði áhættu sjóðanna og opnar fyrir aukin tækifæri í stað smæðarinnar á Íslandi. Umrætt mál væri aftur á móti ekki efnahagslegt vandamál ef Ísland, eins og best reknu lönd veraldar, hefði evru. Þá þyrfti ekki að biðja skaðlega ríkisstjórn um leyfi til að taka bestu ákvarðanir í lífeyrismálum hverju sinni. Málið væri hafið yfir stjórnmálin.
Framsókn er auðvitað argasta afturhald og vill ekki ljá svona máli stuðning. Sá flokkur starfar um afar þrönga hagsmuni örfárra bænda og óttast allar framfarir. Og Vinstri græn er bara einsmáls flokkur og dinglar með svo lengi sem Katrín Jak og Svandís Svavars halda ráðherrastólum. Skítt með almannahagsmuni.
Að vera með krónu er eins og að sofa með tímasprengju undir koddanum.
Að vera með krónu er eins og að sofa með tímasprengju undir koddanum. Maður veit aldrei hvenær hún verður virk og rústar hagkerfinu. Að treysta á gjaldeyrisvaraforða til að jafnvægisstilla gengið er eins og að vera með fiktsaman fingur undir koddanum, sem getur ræst sprengjuna hvenær sem er.
Ef lífeyrissjóðum verður heimilað að fara með aukið fé úr land þá eykst útflæðið og það eykur þrýstinginn á gengið. Samhliða eykst ytri áhætta þjóðarbúsins því forðinn minnkar eins og hann hefur gert undanfarin 2-3 ár í skítareddingum Seðlabankans á krónunni. Samhliða munu erlendar skuldir aukast sem einnig eykur ytri áhættu. Slíkt er ekki á vetur setjandi og farsælast er að taka upp evruna. Það mun einnig auka öryggi landsins gagnvart trylltum einræðisherrum. Fjármálaráðherra á að vera maður til að tala fyrir eigin skoðun í málinu í stað þess að vera brúða búktalara.