- Advertisement -

Davíð má skammast sín

En hvernig hefur Davíð vegnað undir einkaframtakinu?

Jóhann Þorvarðarson skrifar:

Davíð Oddsson hefur mikinn áhuga á öllum opinberum rekstri. Perlan í Öskjuhlíð var byggð þegar hann var borgarstjóri (opinber starfsmaður) og sú bygging hefur ávallt verið rekin með tapi á kostnað skattborgara. Landsbanki og Búnaðarbanki voru einkavinavæddir þegar sami Davíð var forsætisráðherra (opinber starfsmaður). Sú aðgerð leiddi á endanum til fjármálahrunsins á Íslandi. Sú einkavinavæðing kostaði skattgreiðendur fjallgarða af peningum við fjármálahrunið þegar þessi sami Davíð var seðlabankastjóri (opinber starfsmaður). Og þessi víðförli Davíð bauð sig síðan fram til forseta Íslands (opinber starfsmaður) fyrir fjórum árum, en skít tapaði. Á undan öllu þessu þá starfaði þessi Davíð um stund hjá Ríkisútvarpinu þegar Matthildur skemmti landanum (opinber starfsmaður).

En hvernig hefur Davíð vegnað undir einkaframtakinu? Jú, hann gaf eitt sinn út skáldsögu eða var það smásagnasafn. Sú útgáfa endaði víst í tapi. Einu kaupendurnir ku hafa verið viðhlæjendur Davíðs. Á sama tíma og hann þiggur fúlgur fjár í eftirlaun frá hinu opinbera þá hefur Davíð verið ritstjóri Moggans. Blað sem er þekkt fyrir viðvarandi taprekstur á vakt Davíðs. Það er eitthvað lítið um verðmætasköpun hjá Davíð.

Þú gætir haft áhuga á þessum

Ástarsaga Davíð og hins opinbera endar ekki hér. Einkasonur Davíðs vann hjá Lögreglunni (opinber starfsmaður) eitt sinn. Síðan þá hefur sonurinn verið héraðsdómari (opinber starfsmaður). Svo er það Landsréttardómarinn hún Hervör Þorvaldsdóttir, náfrænka Davíðs. Stór hluti af hennar starfsferli er hjá hinu opinbera. Fyrst hjá fógeta ef ég man rétt, svo sem héraðsdómari og nú Landsréttardómari með skömm. Allt störf hjá hinu opinbera. Og svo er það Börkur Þorvaldsson annar náfrændi Davíðs sem þarf bara að vinna einn dag í viku að sögn fyrrverandi forseta Hæstaréttar fyrir himinhá laun. Börkur hefur nú í kringum tuttugu ár verið hæstaréttardómari (opinber starfsmaður).

Svo má ekki gleyma eiginkonu Davíðs. Hún var eitt sinn starfsmaður hjá opinbera heilbrigðiskerfinu (opinber starfsmaður). Og svo þegar Davíð þurfti í mikilvæga skurðaðgerð þá var það ríkissjúkrahúsið Landsspítalinn sem sá um málið eins og frægt var. Já, aldrei má gleyma að Davíð var eitt sinn nemandi við Háskóla Íslands (opinber stofnun).

Davíð hefur átt mikið undir opinberri starfsemi, en hefur samt átt í „love you hate you“ sambandi við hið opinbera. „Hate you“ tilfinningin er samt yfirsterkari þó gengið hafi ofureldið á Davíð og fjölskyldu hans áratugum saman. Já, sannast nú hið fornkveðna að sjaldan þakki kálfurinn gott eldi! Davíð má svo sannarlega skammast sín fyrir að gera lítið úr opinberri starfsemi við hvert tækifæri. Það mun víst aldrei verða þar sem hann kann ekki að skammast sín að sögn fugls sem heldur til í garðinum hans í Skerjafirðinum.


Auglýsing

Tengdar fréttir sem þú gætir haft áhuga á að lesa: