Jóhann Þorvarðarson skrifar:
Fréttablaðið gerir sér forsíðumat úr ofurhagnaði heildsölunnar Lyru.
Hagnaðurinn var tæplega 2 milljarðar króna á síðasta ári hjá 14 manna fyrirtæki; eða 142 milljónir króna á hvern starfsmann.
Upplýst er að langstærsti viðskiptavinurinn sé Landsspítalinn og á grundvelli neyðarréttar vegna heimsfaraldursins þá hafi viðskipti verið án útboðs.
Fréttablaðið kvartar aftur á móti aldrei yfir ofsagróða kvótakónga landsins.
Þeir þurfa aldrei að borga raunverð fyrir einkaaðgang sinn að fiskauðlind þjóðarinnar í gegnum útboðsleið.
Samkvæmt nýjum útreikningum Indriða H Þorlákssonar þá fá kvótafjölskyldur landsins um 60 milljarða króna í afslátt árlega frá auðlindagjöldum miðað við árið 2021.
Innmúraðir klíkubræður fá að vera í friði með sinn ofsagróða á meðan blaðið kvartar sárt þegar lítið heildsölufyrirtæki dettur um hvalrekagróða.
Snepillinn kallar sig fréttablað þegar það er í raun ekkert annað en áróðursmaskína vildarvina blaðsins.
Landsspítalanum blæðir út vegna alvarlegrar vanfjármögnunar og biðraðir eru endalausar.
Kvótafjölskyldurnar kaupa sér aftur á móti heilbrigðisþjónustu annars staðar um leið og gramsað er í seðlabúntunum.