Jóhann Þorvarðarson:
Aumingja túristarnir, sem fara upp á efstu hæð Hallgrímskirkju til að fá aukið útsýni yfir höfuðstaðinn. Þeir eru enn á jarðhæðinni þegar upp er komið.
Í gær þá veitti fjármálaráðherra landsins okkur einstaka innsýn inn í nýjustu uppgötvun eðlisfræðinnar. Hann segir að það sem hækki sé ekki að hækka og átti þar við gjaldskrárhækkanir ríkisstjórnarinnar, sem taka gildi nú um áramótin. Orðrétt þá sagði Bjarni „Ég held að það sé mikilvægt að við gerum okkur grein fyrir því að það verður ekki hægt að ná tökum á verðbólgunni með því að ríkissjóður fari að lækka gjaldskrár“ og átti hann þar við nafnverðsþróun gjalda.
Á mannamáli þá erum við ekki að færast ofar í rúmi ef gengið er upp á næsta fell. Við erum í sömu hæð þegar á toppinn er komið. NASA ætti að taka nýja lögmálið til athugunar áður en næsta geimfar verður sett á loft.
Hækkun gjaldskrár ríkisins mun ekki leiða til hærri verðbólgu að öllu öðru jöfnu, samkvæmt þessum þaulsetnasta ráðherra landsins. Ég spái því að Bjarni Ben fái Nóbelsverðlaunin í eðlisfræði fyrir óvænt, en jafnframt glöggt, framlag til eðlisfræðinnar. Aumingja túristarnir, sem fara upp á efstu hæð Hallgrímskirkju til að fá aukið útsýni yfir höfuðstaðinn. Þeir eru enn á jarðhæðinni þegar upp er komið.