Ferðaskrifstofa Íslands kannast ekki við eigið verkbann og gefur skít í viðskiptavini – Er það Pálmi Haraldsson í hnotskurn?

Ferðaskrifstofa Íslands er eitt þeirra ferðaþjónustufyrirtækja sem greiddi atkvæði með verkbanni Halldórs Benjamíns Þorbergssonar. Það gerði fyrirtækið þegar frekasti maður Íslands, Jóhannes Þór Skúlason framkvæmdastjóri Samtaka ferðaþjónustunnar, sagði já við verkbanni í atkvæðagreiðslu um málið. Bann þar sem ráðist er á lægst launaða fólkið á höfuðborgarsvæðinu, sem er að mestu berskjaldaðar konur.

Þrátt fyrir þetta þá þykist ferðaskrifstofan ekki kannast við eigið verkbann, sem stigmagnar ríkjandi óvissu um flug til og frá Íslandi. Lætur fyrirtækið eins og ekkert sé og er tilbúið að senda ferðalanga í óvissuferð gegn þeirra vilja ellegar tapa andvirði ferðarinnar. Hagur viðskiptavina er að engu hafður.

Þannig er mál með vexti að ég á bókaða stutta sólarferð í næstu viku, en vegna óvissunnar þá afpantaði ég ferðina með vísan í lög um pakkaferðir. Óvíst er hvort flug út verður á tilsettum tíma eða hvort miklar tafir verði á brottför. Einnig er óvíst hvort flogið verður heim á tilsettum tíma eða hvort ferðaskrifstofan bregst við með því að fljúga farþegum fyrr heim en áætlanir gera ráð fyrir. Það styttir stutta ferð. Ferðaskrifstofa Íslands – Plúsferðir neitar að endurgreiða mér þrátt fyrir að ég bendi fyrirtækinu á að ég er ekki aðili að verkfallinu né verkbanninu. Ég á samt að taka mögulegum afleiðingum. Það er mér þvert um geð enda var ég ekki að kaupa óvissuferð heldur afslappandi upplifun á yljandi stað.

Eða glímir Ferðaskrifstofa Íslands – Plúsferðir við fjárhagskröggur?

Ég hef ítrekað andmælt við yfirlætislegan fjármálastjóra Ferðaskrifstofu Íslands. Það var svo ekki fyrr en í fjórða skiptið eftir að ég benti á lagalegu hlið málsins og að fyrirtækið væri gerandi í óvissunni að brugðist var við. Ákveðið var að kalla eftir lögfræðiálit frá frekasta manni Íslands um hvað gæti fallið undir óvenjulegar og ófyrirséðar aðstæður. Hvað ætli það kosti? Alveg örugglega meira en ferðin mín, en ferðaskrifstofan er augljóslega að undirbúa sig undir að fleiri farþegar afpanti af sömu ástæðum ef kjaradeilan leysist ekki.

Eitt er víst að gefa má sér fyrir fram hver niðurstaða lögfræðiálitsins verður, það verður neytendum ekki í hag. Þannig að ég mun líkast til kvarta til Neytendastofu til að byrja með og svo koll af kolli ef kjaradeilan leysist ekki fyrir brottför. Þvermóðska og neitun Ferðaskrifstofu Íslands segir mér að það er tilbúið að taka orðsporsáhættu í nafni græðginnar og traðka á viðskiptavinum sínum enda er stjórnarformaður fyrirtækisins þekktur hrunverji, Pálmi Haraldsson.