Jóhann Þorvarðarson:
Halldór Benjamín er einmitt á þessum froðufellandi stað. Samtökin hljóta því að spyrja sig hvort ekki þurfi annan mann til að koma fram fyrir bláu höndina.
Útgangur og orðfæri Halldórs Benjamíns Þorbergssonar ber þess skýrt merki að Samtök atvinnulífsins eru að fara á taugum. Yfirgangur, frekja og beint talsamband við ríkisstjórn hefur orðið undir, orustan við Eflingu er töpuð.
Frekjustaurinn vill ekki kannast við að hafa tapað dómsmáli í gær eða segir það aukaatriði þó verkföll séu byrjuð. Telur sig síðan vita hug allra félagsmanna Eflingar og núna þarf víst ekki að boða lengur til fundar með formlegum hætti hjá Ríkissáttasemjara. Samninganefnd Eflingar á víst að finna það á sér hvenær fundur er haldinn eða læra um það í fjölmiðlum. Áður hafði hann fett langan fingur út í klæðaburð samninganefndar Eflingar og haft uppi niðrandi orð um formann nefndarinnar.
Það hefur lengi einkennt frekjuvarga að þegar þeir ná ekki sínu fram að þá skal kjaftur rifinn aftur fyrir eyru með tilheyrandi froðufellingu. Halldór Benjamín er einmitt á þessum froðufellandi stað. Samtökin hljóta því að spyrja sig hvort ekki þurfi annan mann til að koma fram fyrir bláu höndina.