- Advertisement -

Hanga á völdum í skjóli Vinstri grænna

Jóhann Þorvarðarson skrifar:

Siðbót með öfugum formerkjum er stefna Vinstri grænna og er sagnfræði- og heimspekideild Háskóla Íslands sérlegur ráðgjafi í þeim efnum.  

Fjármálaráðherra Bjarni Ben sat áfram, og situr enn, við völd þó hann hafi brotið sóttvarnarreglur í Ásmundarsal. Undirsátann hún Áslaug Arna, þyrluflugs húkkarinn, hringdi bara í lögguna og var með dólg. Tvisvar sinnum. Þessu er öðruvísi farið þar sem siðferði er ekki lágkúrulegt. Fólk er látið sæta ábyrgð. Nýjasta dæmið er að stjórnarformaður Svissneska risabankans Credit Suisse, António Horta-Osório, var látin hætta um helgina vegna brota á sóttvarnarreglum. Hegðun sem sögð er tefla orðspori bankans í hættu.

Hinn ólýðræðis kjörni Seðlabankastjóri Íslands situr enn við völd eins og Bjarni Ben. Og það þrátt fyrir að vera ásakaður um hugverka- og ritstuld í tveimur málum. Annað er til skoðunar hjá óhlutlausri siðanefnd Háskóla Íslands á meðan hitt málið hefur nú þegar verið úrskurðað. Þar segir að það sé hafið yfir vafa að um ritstuld var að ræða. Seðlabankastjóri snýr bara út úr. Fyrst sagði hann að Alþingi væri skálkaskjólið sitt og því mætti hann gera hvað sem er við eigur annarra höfunda. Þegar enginn utan sértrúarsafnaðar seðlabankastjóra tók mark á útskýringunni þá keypti hann bara meint sakleysi hjá vin við sagnfræði- og heimspekideild Háskóla Íslands. Sá sem seldi seðlabankastjóra aflátsbréfið ku víst eiga fleiri slík í fórum sínum ætluð vildarvinum. Siðbótin náði augljóslega ekki inn í þessa háskóladeild, þar sem bróðir forsætisráðherra starfar.    

Í Bandaríkjunum þá hafa þrír stjórnarmenn Seðlabanka Bandaríkjanna sagt af sér vegna vafasamra fortíðar á fjármálamarkaði. Forsætisráðherrann Katrín Jak gerir hlutina öðruvísi og skipaði bara núverandi seðlabankastjóra þrátt fyrir skítuga fortíð. Hann er nefnilega sonur fyrrverandi ráðherra Vinstri grænna. Þetta kemur engum á óvart enda Vinstri græn upptekin við að halda vafasömum pésum við völd og afmá eðlileg siðferðisviðmið. Siðbót með öfugum formerkjum er stefna Vinstri grænna og er sagnfræði- og heimspekideild Háskóla Íslands sérlegur ráðgjafi í þeim efnum.  


Tengdar fréttir sem þú gætir haft áhuga á að lesa: