„…þá get ég a.m.k. sagt að það var ýmislegt sem benti til þess að það að námið væri frítt hafi gert það að verkum að ásókn hingað væri miklu meiri en hún hefur verið á Norðurlöndunum.“
Logi Einarsson ráðherra háskóla.
„Ég þakka hæstvirtum ráðherra fyrir svarið þótt það hafi ekki komið alveg skýrt fram hvort hann deili áhyggjum mínum af því að það hafi raunverulega tíðkast ákveðin misnotkun í þessu kerfi. Það væri fróðlegt að fá það fram,“ sagði Snorri Másson Miðflokki á Alþingi.
„Hins vegar er hin spurningin um þetta sú að sannarlega eru auðvitað alltaf alþjóðlegir nemendur við háskóla eða hluta af háskólastarfi. Hér á Íslandi náttúrlega stofnum við Háskóla Íslands fyrir Íslendinga og við hugsum að þarna þurfum við að hugsa á íslensku, fræðast á íslensku og vera með ákveðna starfsemi á íslensku og það er mjög mikilvægt fyrir okkar þjóðmenningu,“ sagði Snorri og hélt áfram:
„Það er svona upphaflegt markmið háskólans og svo verður náttúrlega mjög mikil, alþjóðleg þróun í öllu háskólastarfi með tíð og tíma. Ég velti því fyrir mér að núna er t.d. fjallað um það af hálfu háskólans að það þurfi að auka hlutdeild nemenda með erlendan bakgrunn í skólanum. Það er jafnvel fjallað um það í viðtölum, ég get vísað í það beint, að það þurfi hreinlega, eins og einn inngildingarsérfræðingur háskólans sagði, að breyta DNA háskólasamfélagsins vegna þess að það var upphaflega hannað fyrir Íslendinga en síðan breytist samfélagið. Hver eru sjónarmið hæstvirts ráðherra á þessu sviði? Tekur hann undir það? Ég er alveg hjartanlega sammála því að auðvitað hjálpum við innflytjendum að aðlagast og taka svo þátt í háskólasamfélaginu, en þarf að breyta DNA háskólans til að koma til móts við það? Það er spurning.“
Logi Einarsson háskólaráðherra svaraði Snorra svona:
Það þarf að skoða þetta allt í samhengi.
„Nú ætla ég ekki inn á kennarastofu einstakra háskóla eða inn á skrifstofu rektors og fara að segja þeim fyrir verkum með hvaða hætti þau reka sínar stofnanir. Almennt ber okkur að tryggja góða lagaumgjörð og tryggja fjármagn til þess að hér séu reknir góðir háskólar. Veruleikinn er orðinn miklu flóknari hér á Íslandi heldur en var fyrir bara 40–50 árum. Hér búa t.d. 85.000 landsmenn af erlendum uppruna, sumir þeirra komu utan EES og það þarf að skoða þetta allt í samhengi,“ sagði ráðherra og bætti við:
„Svo ég svari nú spurningu úr fyrra andsvari háttvirts þingmanns, hvort ég teldi að um misnotkun á kerfinu hafi verið að ræða, þá get ég a.m.k. sagt að það var ýmislegt sem benti til þess að það að námið væri frítt hafi gert það að verkum að ásókn hingað væri miklu meiri en hún hefur verið á Norðurlöndunum. Það var full ástæða til að taka á því, m.a. til að nýta takmarkað fjármagn betur fyrir skólana.“
