- Advertisement -

Hin heimska Framsókn

Jóhann Þorvarðarson skrifar:

Þannig að þrír Sjálfstæðisflokkar munu bjóða fram í borginni í vor. Hinir flokkarnir eru móðurflokkurinn og klofningurinn Viðreisn.

Þessi dauðans della.

Um langa hríð þá hefur Lilja Alfreðsdóttir þingmaður Framsóknar ekki mælt af viti. Nýlega talaði hún fyrir því að leggja aftur á bankaskatt, en sú aðgerð færi auðvitað beint út í verðlagið. Legðist þungt á skuldara. Bæði heimili og fyrirtæki landsins. Síðan kom enn kjánalegri formaður Framsóknar og sagðist vilja skjóta sendiboðann á færi. Verðlagsmælingar Hagstofunnar létu víst ríkisstjórnina og Seðlabanka líta svo illa út að nauðsynlegt væri að breyta mælinum. Hann sýndi of mikinn hraða. Framsókn talar ekkert um slaka hagstjórn landsins því það opinberar getuleysið. Þess vegna er betra að falsa mælingarnar þó Hagstofan fari eftir alþjóðlegum stöðlum í verðbólgumælingum.

Í vikunni þá bætti Lilja um betur og sagði íbúðaskort vera Samfylkingunni að kenna. Þessi dauðans della Lilju hefur verið hrakin oftar en þægilegt er fyrir Framsókn af Húsnæðis- og mannvirkjastofnun, Miðjunni og fleiri aðilum. Þó svo að Framsókn sitji í ríkisstjórn þá virðist það hafa farið fram hjá flokknum að á árinu 2019 var talað um offramboð á húsnæði á landinu. Síðan lækkaði Seðlabankinn stýrivexti niður í sögulegt lágmark um leið og sveiflujöfnunaraukinn var afnuminn á árinu 2020. Við það jókst útlánageta banka um meira en 12 prósent í einni svipan og skyndilega varð of mikil eftirspurn í miðjum faraldrinum.

Svo virðist Lilja ekki vita að Samfylkingin fer ekki með stjórn landsins né stjórn helstu sveitarfélaga landsins. Bara hér á Suðvestur horninu þá fer sá flokkur sem Framsókn er aukahjól undir með stjórnin í Garðabæ, Hafnarfirði og á Seltjörninni.

Svo hafa dauðsföll vegna Kóvít-19 aldrei verið fleiri í faraldrinum en eftir að Willum framsóknarmaður tók við heilbrigðisráðuneytinu. Og enn eina ferðina er Landsspítalinn á leið á hættustig og þar ber Framsóknarflokkurinn alla ábyrgð enda einkennir heimska þann flokk. Í réttu samhengi við þennan óflokk þá telur Framsókn farsælast að sækja Einar Þorsteinsson innan úr öfgahægri Sjálfstæðisflokksins til að leiða Framsókn í borgarstjórakosningunum. Þannig að þrír Sjálfstæðisflokkar munu bjóða fram í borginni í vor. Hinir flokkarnir eru móðurflokkurinn og klofningurinn Viðreisn.


Tengdar fréttir sem þú gætir haft áhuga á að lesa: