Er stjórnarandstaðan sest niður á biðstofu Bjarna Benediktssonar?
Skjáskot: Silfrið. Samsetning: Miðjan.
Við lestur nýjustu greinar Jóhanns Þorvarðarsonar hér á Miðjunni vakna upp margar spurningar. Ein þeirra og kannski sú veigamesta er: Hvar er stjórnarandstaðan? Já, hvar er hún? Ég held að í huganum sé stjórnarandstaðan búinn að koma sér fyrir á biðstofunni hjá Bjarna Ben.
Öll stjórnarandstaðan virðist hafa komist að sömu niðurstöðu. Án Bjarna komast þau ekki í ríkisstjórn. Þess vegna er gagnrýni á óhæfisverk Bjarna sama og engin. Jóhann Þorvarðarson hefur margsinnis bent á óhæfu Bjarna og þá Katrínar og Sigurðar Inga. Svo er sem Katrín og Sigurður Ingi hafi látið Bjarna einan um ríkisfjármálin og hvernig peningum var komið til útvalinna í nafni efnahagsaðgerða vegna Covid.
Hér hefur tekist illa til. Við erum eftirbátar annarra þjóða. Bjarni fékk að streyma peningum á valda staði. Árangurinn er sá sem hann er. Þrátt fyrir að Bjarni, Katrín og Sigurður Ingi hafi gefið mörg færi á sér tiplar stjórnarandstaðan á tánum í kringum þau. Öll vilja þau í ríkisstjórn. Meira að segja með Bjarna. Hann er lykillinn.
Hér er stiklað á stóru í afrekaskrá ríkisstjórnarinnar:
- Hæstu vextir.
- Mesta verðbólgan.
- Mesta atvinnuleysið.
Þarf meira til að stjórnarandstaðan sinni hlutverki sínu.
-sme
