„En beiðni um áfrýjun er ekki enn þá farin frá íslenskum stjórnvöldum. Enn er verið að vinna það bréf.“
„Það er ekki hægt að bíða niðurstöðu yfirdeildar vegna málskots íslenska ríkisins sem enn er ekki farið út til Strassborgar. Hvort sem áfrýjun verður leyfð eða ekki er staðan ljós. Það verður að koma Landsrétti til aðstoðar. Því spyr ég hæstvirtan dómsmálaráðherra: Er ekki rétt að fara að sinna því ábyrgðarhlutverki sem þið hafið að hafa réttarkerfið á Íslandi starfhæft?“
Það var Helga Vala Helgadóttir sem svo mælti á Alþingi í gær. Hún beindi orðum sínum til Þórdísar Kolbrúnar R. Gylfadóttur dómsmálaráðherra, sem svaraði:
„Hér er spurt: Hvað ætlar ríkisstjórnin að gera og hvað ætlar ríkisstjórnin að gera til að koma þeim til aðstoðar? Ég sagði þegar ég tók þá ákvörðun að við ættum að óska eftir endurskoðun að ég ætlaði ekki að grípa til annarra aðgerða fyrr en við fengjum úr því skorið hvort málið yrði tekið fyrir eða ekki. Mér finnst stundum í umræðunni eins og þetta sé ekkert mál eða lítið mál og sjálfsagt, að það liggi fyrir tillögur og við þurfum aðeins að velja hver þeirra sé skást til þess að laga stöðuna þannig að við séum þá komin með óumdeildan 15 manna Landsrétt. Ég hef hins vegar ekki séð neina tillögu sem lagar stöðuna sem við erum í.“
Helga Vala: „Réttarkerfið starfhæft?“ Og svo bætti hún við: „Það eru þrjár vikur síðan ríkisstjórninni datt í hug, fimm vikum eftir að dómur féll, að áfrýja. En beiðni um áfrýjun er ekki enn þá farin frá íslenskum stjórnvöldum. Enn er verið að vinna það bréf.“
Ráðherrann svaraði: „Það var tekin ákvörðun um að óska eftir endurskoðun og það tekur tíma að vinna slíkt erindi. Ég skammast mín ekki fyrir að taka þann tíma sem ég tel að þurfi að taka til að það sé almennilega gert.“