„Íslensk stjórnvöld þurfa að bæta sig til muna í eftirliti með mútubrotum að mati starfshóps Efnahags- og framfarastofnunarinnar (OECD). Í skýrslu um mútubrot í alþjóðaviðskiptum sem stofnunin birti í gær kemur fram að Íslendingar hafi haft ranghugmyndir um að íslenskir einstaklingar taki ekki þátt í alþjóðlegum mútugreiðslum.“
Þetta er fengið úr frétt í Fréttablaðinu.
Þetta er alrangt. Allir vita að mútur tíðkast og hafa tíðkast. Málið er að yfirvöld, í langan, langan tíma, hafa kosið að viðhalda mútum, koma alls ekki í veg fyrir þær. Fyrir meira en þrjátíu árum sat ég, sem blaðamaður, í dómssal þar sem réttað var í þekktu sakamáli. Þar mátti ekki tala um mútur – þess í stað var talað um fyrirgreiðslufé. Það er svo sem annað mál.
„Starfshópurinn telur að þessi rótgróna ranghugmynd í hugum Íslendinga hafi valdið því að hingað til hafi eftirliti með og rannsóknum á mögulegum mútugreiðslum íslenskra einstaklinga verið verulega ábótavant,“ segir OECD.
Enn er farið með rangindi. Íslendingar vita af mútum, rétt eins og aðrar þjóðir, en Íslendingar hafa kappkostað við að rannsaka ekki mútur. Vilja viðhalda þeim.
„Þær hafa í raun ekki verið neinar þar til Samherjamálið kom upp á yfirborðið í lok síðasta árs. Það mál hefur að mati hópsins splundrað hugmyndum Íslendinga um að hér greiði enginn mútur,“ segir í fréttinni í Fréttablaðinu.
Við næstu athugasemdum verður íslensku skollaeyrunum skellt yfir málið.
„Er tekið fram að íslenska ríkið verði að grípa til ráðstafana til að framvegis verði frumkvæði sýnt í rannsóknum og eftirliti á mögulegum mútubrotum.“
Fullkomlega er vonlaust að íslensk stjórnvöld grípi til aðgerða. Þeim þykir þetta eflaust fínt svona.
-sme