Jóhann Þorvarðarson:
Mörlandinn lætur aftur á móti ekki plata sig enda er fylgi Sjálfstæðisflokksins á húrrandi niðurleið og verður brátt komið í eins stafa tölu.
Ég veit ekki hversu oft Þórdís Kolbrún sagði í vikunni að fundur Evrópuráðsins væri ekki síst til þess fallinn að styrkja lýðræði Evrópu. Gott og vel svo langt sem þessi orð ná, en Þórdís Kolbrún er bara ekki trúverðugur fulltrúi lýðræðis. Ásamt öðrum þingmönnum Sjálfstæðisflokksins þá lagði hún blessun sína yfir kosningasvindlið í Hótel Borgarnesi í síðustu Alþingiskosningum. Í svindlinu þá rótaði innmúraður sjálfstæðismaður og dómari, Ingi Tryggvason, í atkvæðum án eftirlits í skjóli nætur.
Þá dúkkuðu 12 ný atkvæði upp eins og hendi væri veifað. Líkurnar á að öll 12 atkvæðin lentu síðan í einum og sama bunkanum voru litlar sem engar. Það gerðist nú samt því Ingi var ekki skipulagðari en svo. Hann treysti nefnilega á að allir aðrir væru vitleysingar. Og líkurnar á að Sjálfstæðisflokkurinn fengi 10 af þessum 12 uppdiktuðu atkvæðum voru ekki nema 0,000661 prósent. Sem sagt, stórkostleg ólíkindi eða engar líkur á mannamáli.
Ný þykist Þórdís Kolbrún vera í fylkingarbrjósti lýðræðis í Evrópu, en það vantaði ekki annað upp á en að Þórdís klæddist hvítum Jesúserk og geislabaug til að fullkomna heilagleikann í boðskap sínum. Sem betur fer þá fjallaði heimspressan sama og ekkert um fundinn og er því von um að tvöfeldni Þórdísar Kolbrúnar spyrjist ekki út. Mörlandinn lætur aftur á móti ekki plata sig enda er fylgi Sjálfstæðisflokksins á húrrandi niðurleið og verður brátt komið í eins stafa tölu. Hvítur serkur og geislabaugur mun engu breyta neinu þar.