- Advertisement -

Katrín Jak og Bjarkey Olsen á flótta!

Staðreyndin er að vaxtalækkanir eru því miður að skila sér illa áfram til allra.

Jóhann Þorvarðarson skrifar:

Vinstri grænir eru á hlaupum undan raunveruleikanum og eigin loforðum. Þar fara fremst matrónurnar Katrín forsætisráðherra og Bjarkey Olsen fjárlaganefndarmaður. Þeim er alveg ómögulegt að svara einfaldri spurningu frá Guðmundi Inga Kristinssyni þingmanni. Hin slétta spurning var af hverju sumir aldraðir og öryrkjar eiga að lifa af tekjum sem eru 70-86.000 krónum undir lágmarkslaunum?

Matrónurnar sem kenna sig við jöfnuð í orði, en ekki á borði, tóku til við að tala um óskyld mál í ósvörum sínum. Þar bar hæst að Lífskjarasamningarnir séu orsök vaxtalækkunar nú um stundir á Íslandi. Einnig var því haldið fram að lækkunarferlið leiði til almennra kjarabóta vegna þess að greiðslubyrði íbúðalána muni lækka. Þetta er misskilningur og þarf töluvert þekkingarleysi að halda slíku fram eins og Bjarkey Olsen gerði. Fyrir þessu eru þrjár ástæður. Sú augljósa og fyrsta er að sjálfstæður seðlabanki lætur ekki kjarasamninga segja sér fyrir verkum. Bankinn mun hækka vexti strax og aðstæður krefja á um það sama hvað stendur í einhverjum kjarasamningi.

Þú gætir haft áhuga á þessum


Þriðja ástæðan er að lækkandi vextir hér á landi koma ekki öllum einstaklingum til góða.

Önnur ástæða tengist heimsbúskapnum. Vextir í heiminum hafa verið lágir og lækkandi og tengist það ekki íslenskum kjarasamningum. Ástæða lágra vaxta má sjóða niður í þá staðreynd að verðbólguþrýstingur er lítill vítt og breytt um veröldina. Peningaframboð í stærstu hagkerfum heimsins er síðan tröllvaxið. Þetta hefur bein áhrif á íslenska hagkerfið

Þriðja ástæðan er að lækkandi vextir hér á landi koma ekki öllum einstaklingum til góða. Helst þeim sem eru að taka ný lán eða geta endurfjármagnað á hagstæðari kjörum. Það er aftur á móti bláköld staðreynd að ýmsir stórir lánendur á Íslandi hafa ekki lækkað sína vexti. Ágætt dæmi er Lífeyrissjóðurinn Brú sem hefur ákveðið að halda vöxtum óbreyttum í 5,6% á óverðtryggðum íbúðalánum. Þetta táknar að þeir sem starfa hjá Reykjavíkurborg og eru með óverðtryggð lán njóta ekki kjarabóta vegna lækkunar vaxta. Allavega ekki næstu 3 árin. Svona er staðan víðar í hagkerfinu!

Ekki má gleyma að borgarstarfsmenn eru skyldaðir til aðildar að Brú og geta ekki snúið sér til betur rekinna lífeyrissjóða eins og Birtu. Eini möguleikinn er þá viðskiptabanki viðkomandi launþega. Þar eru kjörin bara lítið betri þrátt fyrir vaxtalækkanir að undanförnu. Landsbankinn býður til dæmis 5,55% fasta vexti í 36 mánuði. Ef e-r vill nýta sér þessi aðeins betri kjör þá er hagurinn étinn upp með uppgreiðslugjaldi og öðrum kostnaði þar sem það á við. Þannig að hagræðið kemur ekki fram fyrr en kannski eftir 2-3 ár. Að þeim tíma liðnum gætu aðstæður á markaði hafa breyst aftur og vextir með. Þannig að það er ekki á vísan að róa í þessum efnum þegar breytingarnar eru litlar. Hringlandaháttur getur komið illa út þegar öllu er á botninn hvolft.


Það var pínlegt að hlusta á aðalmatrónuna.

Staðreyndin er að vaxtalækkanir eru því miður að skila sér illa áfram til allra. Það hljóta að vera vonbrigði fyrir launþegasamtök sem eiga aðild að Lífskjarasamningnum. Persónulega tel ég að samtökin hafi gert mistök með því að leggja þessa miklu áherslu á vaxtalækkun fremur en önnur atriði. Það lá ótvírætt fyrir á tíma kjaraviðræðna í vor að væntingar um verðbólgu og vexti í heiminum, Ísland með talið, voru niður á við. Það þurfti því ekki að semja um það sem var yfirvofandi.

Snúum okkur að ávarpi forsætisráðherra um að væntanlegar skattabreytingar komi til með að skipta miklu máli. Það var pínlegt að hlusta á aðalmatrónuna. Samkvæmt mínum útreikningum fær sá launalægsti um 350 krónur að núvirði meira til ráðstöfunar en ella. Sá sem er með 850.000 krónur fær 1.600 krónur. Þarna á milli er hópur með 325.000 krónur í mánaðarlaun. Staða þessa hóps batnar um 3.650 krónur. En Davíð verður ekki lengi í Paradís Katrínar og Bjarkeyjar. Nýir skattar koma strax til eins og til dæmis sorpgjald. Og það er meira í burðarliðnum. Svo var ríkisfyrirtækið Landsvirkjun að hækka sína gjaldskrá um 2,5%. Svona telur þetta áfram. Á endanum verður staða þeirra lægst launuðu verri en áður og Lífskjarasamningarnir komast í uppnámi. Katrín Jak áttar sig bara ekki á orsökum og afleiðingu í heildarsamhenginu. Svo leysir það ekkert að vera á hlaupum undan eigin ákvörðunum sem eru að raungerast nú um stundir.

Eftir mas matrónanna í ræðustól Alþingis stendur það eftir að spurningu Guðmundar Inga er ósvarað. Svarleysið verður ekki túlkað á annan veg en að fyrirlitning í garð þessa berskjaldaða hóps ráði hér för! Þetta eru sem sagt breiðu bökin sem Katrín Jak og Bjarkey Olsen vilja að herði sultarólina inn fyrir hungurlús. Já, jafnaðarstefna Vinstri grænna í verki er hryggðarmynd!


Booking.com

Tengdar fréttir sem þú gætir haft áhuga á að lesa: