- Advertisement -

Katrín Jak syngur „Þú fullkomnar mig“

Dæmi í sinni einföldustu mynd er að fjögur prósent ávöxtun í fjögur prósent verðbólgu verður ekki skattlögð.

Jóhann Þorvarðarson skrifar:

Það er stórundarlegt að horfa upp á Vinstri græn, undir leiðsögn Sjálfstæðisflokksins, leiða í lög að skattleggja eingöngu raunhagnað peninga. Á mannamáli þýðir þetta að draga skal verðbólgu ársins frá áður en tekjur af peningum eru skattlagðar. Þannig er í raun verið að ríkis-verðtryggja raunávöxtun peninga svo lengi sem ávöxtun er ekki undir verðbólgu hvers tíma. Dæmi í sinni einföldustu mynd er að fjögur prósent ávöxtun í fjögur prósent verðbólgu verður ekki skattlögð. Almúginn á þannig að vernda auðmagnið fyrir efnahagslegri ókyrrð með því að færa því mýkra sæti undir sinn botn þegar farið er yfir ósléttan efnahagsveginn. Já, og meiri ávöxtun þegar vel árar. Það mun bara fljóta um á bleiku skýi.

Allir vita hverjir eiga peninga í þessu landi svo einhverju nemi fyrir utan lífeyrissjóðina þannig að auðstéttin er að fá hér auka viðbit með lagabreytingunni. Skattafslátturinn sem af hlýst verður síðan fjármagnaður beint úr vasa launþega með beinum eða óbeinum hætti nema skera eigi niður sameiginlega velferð samfélagsins.

Í raun munu landsmenn niðurgreiða áhættu óreiðumanna.

Ég hef áður sagt ykkur frá því að sérfræðingar, sem stunda það að taka hluta af eigin launum út sem arð í gegnum einkahlutafélög, geta lækkað tekjuskattsbyrði sína um 28 prósent í samanburði við að vera launþegi. Um þetta má lesa nánar hér Bjarni Ben hugsar um sitt fólk! og hér Meira um Bjarna Ben og Lindu. Nú á að auðvelda þessum hópi að lækka skattgreiðslur sínar enn frekar með því að skattleggja eingöngu raunvirði arðsins. Síðan geta sérfræðingarnir breytt inneign sinni hjá einkahlutafélögum í formlegt vaxtaberandi lán og tekið hluta launa út í formi vaxtatekna í stað arðs. Báðar leiðirnar skila sömu niðurstöðu um að aðeins rauntekjur peninga verða skattlagðar. Til að toppa allt þetta þá gjaldfærir fyrirtækið vaxtagreiðslurnar og lækkar þannig sína skatta. Þetta er stórkostleg vinningsstaða frá öllum hliðum fyrir auðmagnið.

Þetta endar svo sem ekki hér því í fyrirliggjandi fjárlagafrumvarpi þá er stefnt að því að fjárfesting í hlutabréfum veiti skattafslátt. Í raun munu landsmenn niðurgreiða áhættu óreiðumanna. Slá má því föstu að Bláa-Kata og Vinstri græn séu orðin dökkblá í hugsun, flokkur aukinnar misskiptingar og mismunar. Vaknar þá spurningin enn og aftur hvenær Vinstri græn færa eigið lögheimili að Háaleitisbraut 1 þar sem helblái flokkurinn á heima. Heyrst hefur til Bláu-Kötu raula „Þú fullkomnar mig“ þegar lögheimilisflutningurinn ber á góma um leið og hún blikkar Bjarna Ben formann helbláa flokksins.   

Í ljósi þess að svona er fyrir komið þá tel ég næsta víst að launþegahreyfingin muni nú setja fram kröfu um að eingöngu raunlaun verði skattlögð. Öðruvísi er ekki gætt jafnræðis milli landsmanna í þessum efnum. Þegar þær kröfur koma upp þá munu andmæli flæða yfir landsmenn frá Samtökum atvinnulífsins og Sjálfstæðisflokknum ásamt fölskum röksemdum.


Tengdar fréttir sem þú gætir haft áhuga á að lesa: