- Advertisement -

Kurr innan Viðreisnar

Jóhann Þorvarðarson skrifar:

Þorgerður Katrín átti í hinu mesta basli. Utanbókarlærdómur hennar dreif stutt, var  yfirborðskenndur. Hún var óðamála, langorð, óskýr og fór rangt með.

Viðreisn er í tilvistarkreppu eftir kosningarnar. Hún var ekki stofnuð til að vera smáflokkur upp á 8 prósent. Lágt fylgi er nefnilega að jafnaði ávísun á áhrifaleysi í landsmálum. Tvennar kosningar í röð þá er Viðreisn jaðarsettur undir forystu lögfræðingsins Þorgerðar Katrínar Gunnarsdóttur. Hún hlýtur því að íhuga stöðu sína því hún aflar ekki. Í Suðvestur kjördæmi þá fékk Viðreisn 165 prósent færri atkvæði en Sjálfstæðisflokkurinn þrátt fyrir að tefla sjónvarpsmanninum geðþekka Sigmari Guðmundssyni fram.

Það var áberandi í kosningabaráttunni að lögfræðingurinn Þorgerður Katrín kann lítil skil á aðalstefnumáli Viðreisnar, tengingu krónunnar við evruna og síðar upptöku evrunnar. Hún talar af vanþekkingu um efnið og er lítt sannfærandi. það kom vel fram þegar hún átti í orðaskaki í kosningabaráttunni við Bjarna Ben lögfræðing, sem einnig er veikur á svellinu í gjldmiðlamálum. Þorgerður Katrín átti í hinu mesta basli. Utanbókarlærdómur hennar dreif stutt, var  yfirborðskenndur. Hún var óðamála, langorð, óskýr og fór rangt með.

Viðreisn gerði sömu mistök og Samfylkingin fyrir kosningarnar. Flokkslýðræðið var afnumið. Hinn almenni félagsmaður hafði ekkert um það að segja hvernig framboðslistarnir voru skipaðir. Þröng flokksklíka tók ákvarðanir. Klíkuáráttan fer ekki vel í kjósendur og sýndu þeir hug sinn og kusu að langmestu aðra flokka. Samtals fengu flokkarnir tveir ekki nema 18 prósent atkvæða.

Þú gætir haft áhuga á þessum

Framboðslistinn var einfaldlega ótrúverðugur og ósjarmerandi.

Sem dæmi þá var Þorbjörg Sigríður Gunnlaugsdóttir handvalin í fyrsta sæti í Reykjavík norður. Hún er enn einn lögfræðingurinn sem á að tala fyrir helsta stefnumáli flokksins sem er á málefnasviði hagfræðinnar. Hún hefur ekki þekkingu á gjaldmiðlamálum. Hana skortur einnig kjörþokka svo talað sé hreint út. Viðreisn fékk aðeins 7,7 prósent atkvæða í Reykjavík norður eða jafnmikið og Flokkur fólksins. Númer 2 á lista Viðreisnar í Reykjavík norður er annar lögfræðingur. Það er því ekki að undra að gengið hafi verið arfalélegt í kjördæminu. Framboðslistinn var einfaldlega ótrúverðugur og ósjarmerandi. Viðreisn fékk 164 prósent færri atkvæði en Sjálfstæðisflokkurinn í RVK norður, sem spilaði lélegt mót í kjördæminu.

Örvænting gæti gripið Viðreisn og menn ákveðið að yfirgefa sitt helsta kosningaloforð til að komast í ríkisstjórn með Sjálfstæðisflokknum. Það yrði harakírí að hætti Vinstri grænna. Hvað Þorgerði Katrínu varðar þá truflar það mögulega kjósendur að hún á sér vafasama fortíð frá fjármálahruninu sem hún hefur aldrei svarað fyrir. Hún og eiginmaður hennar fengu hátt í þrjá milljarða króna að núvirði afskrifaða á sama tíma og þúsundir fjölskyldna misstu heimili sín.


Tengdar fréttir sem þú gætir haft áhuga á að lesa: