Með jarðsmugu upp á hvirfil og mótþróaröskun í sinni

Katrín Jakobsdóttir lætur ekki segjast og axlar alls ekki ábyrgð á axarsköftum sínum þrátt fyrir að jarðsmugubreiðan nái upp á hvirfil. Mótþróaröskun í sinni forsætisráðherra kemur í veg fyrir það.

Landið er að glíma við meiriháttar efnahagsvandamál að tvennu leyti. Annars vegar er uppsöfnuð verðbólga á Íslandi síðan Katrín skipaði lubbamennið seðlabankastjóra 30 prósent eða um 7,5 prósent á ári að jafnaði.  Hins vegar er landið stjórnlaust á öðrum sviðum efnahagslífsins sem kemur fram í óstjórnlegri þenslu, árás á lífríki landsins í nafni græðginnar og átroðningi á ósnert víðerni vegna gróðafíknar ferðaþjónustunnar. Eina viðbragð ríkisstjórnar Katrínar Jak er að tala úti tómið og blekkja sjálfan sig um að þetta reddist.

Ég hef verið eins og hrópandinn í eyðimörkinni í viðvörunum um mannhundinn í Seðlabanka Íslands á umliðnum misserum. Nú hefur einfaldlega komið í ljós að rakkinn er háskagripur. Alveg eins og hann var  fyrir fjármálahrunið þegar hann sagði að handan við hornið væri betri tíð með blóm í haga. Svo fór Kaupþing banki á hvínandi kúpuna.

Hann hefur þar með umpólast í afstöðu sinni.

Núna er kominn nýr frasi hjá honum um að íslenskt hagkerfi eigi það til að koma skemmtilega á óvart. Yfirlýsingin kemur nú þegar þúsundir heimila og fyrirtækja standa frammi fyrir skaðanum að hafa tekið mark á lygum um að vextir væru komnir til með að vera lágir og að verðtryggingin tilheyrði fortíðinni. Um leið hvetur lubbamennið fólk til að huga að verðtryggðum lánum þegar vaxtafestan líður undir lok. Hann hefur þar með umpólast í afstöðu sinni.

Þeir sem telja verðbólgu vera í rénum eru á hálum óskhyggjuís. Málsmetandi fræðimenn eru þar taldir með. Olíutunnan hefur hækkað um 37 prósent frá því seint í júní og mánaðarlegar verðhækkanir í ágúst hjá mörgum ríkjum evrusvæðisins vekja hjá manni ugg. Vestan megin við Ísland þá hefur undirliggjandi verðbólgan í Bandaríkjum sýnt þrákelkni alveg eins og forsætisráðherra Íslands. Kjarnabólgan hefur ekki náð að fara undir 4 prósentin. Norðan við Bandaríkin er verðbólgan aftur á uppleið og er komin í 4 prósent í Kanada eftir að hafa botnað í 2,8 prósentum í júní. Þannig að útlitið er ekki gott enda hef ég ekki séð ástæðu til að senda frá mér nýtt verðbólgumat. Ég tel enn að bólgan geti farið í 12 prósent á ársgrundvelli.

Stór hluti efnahagsvanda Íslands liggur í því að landinu er ekki stjórnað af landsliðsfólki. Þess vegna er bráðnauðsynlegt að boða til kosninga svo nýtt fólk komist að stjórnborðinu. Við getum ekki látið reka á reiðanum vegna andlegs þverlyndis Katrínar Jakobsdóttur.