Múrarameistarinn dæmalausi

Jóhann Þorvarðarson skrifar:

…en nefnir aldrei hin sveitarfélögin sem stjórnað er af félagi múrarameistara: Garðabær, Kópavogur, Seltjarnarnes og Hafnarfjörður. Upptalið nes er á barmi gjaldþrots og vogurinn gefur hundruð milljóna króna til alræmdrar fjölskyldu í gegnum Reit 13.

Það er þjóðarböl að formaður Berlínarmúrsflokksins skuli vera ráðherra eða þingmaður. Sá ástundar vinnusvik eins og langur listinn ber vitnisburð um. Vegna tveggja pólitískra svikakvenda þá situr hann samt við völd og ræður öllu sem hann vill ráða. Meira að segja hvort hér á landi séu stundaðar hvalveiðar eða ekki. Ódygðin í kringum múrarann er af efnahagslegum og siðferðilegum toga. Slæm  haghegðunin veldur mikilli verðbólgu og sukksemi með opinbert fé. Mórölsk framkoman hefur síðan afmáð inngrónar umgengnisreglur siðaðra samfélaga.

Nýjasta atið er af kunnuglegum meiði og fyrir barðinu núna er Borgarlínan. Þusar múrarameistarinn um að gamlar kostnaðaráætlanir standist ekki og að meint kostnaðaraukning sé óboðleg. Í þessu samhengi þá sparkar hann ómaklega í Reykjavík, en nefnir aldrei hin sveitarfélögin sem stjórnað er af félagi múrarameistara: Garðabær, Kópavogur, Seltjarnarnes og Hafnarfjörður. Upptalið nes er á barmi gjaldþrots og vogurinn gefur hundruð milljóna króna til alræmdrar fjölskyldu í gegnum Reit 13.

Þegar grannt er skoðað þá getur formaður múrarafélagsins eingöngu álasað sjálfum sér enda er hann með alla þræði Borgarlínunnar á eigin hendi. Stjórnarformaður Betri samgangna er til dæmis múrarinn Árni M. Mathiesen, sem gat sér það til frægðar að ásaka aðra um að sjá ekki veisluna þegar allt var á leið í hrun. Einn af þremur stjórnarmönnum kemur svo úr röðum múrara í Kópavogi og framkvæmdastjóri Betri samgangna er innvígður múrarameistari, Davíð Þorláksson.