Jóhann Þorvarðarson:
Verkfærakista og lyfjaskápur Seðlabanka Íslands hefur að geyma ýmis prýðileg tól og bólgulyf sem unnið geta gegn verðbólgu, en vegna rangrar notkunar, rangra tímasetninga, rangra greininga, rangra ályktana, rangra ákvarðana og ábyrgðarlausra tjáninga seðlabankastjóra þá er verðbólgan óbeisluð.
Stórundarlegar yfirlýsingar, ósannsögli, ritstuldur, dómgreindarskortur og athyglissýki seðlabankastjóra Seðlabanka Íslands kemur úr botnlausri hít. Og nýjasti fjölmiðlafundur bankans í vikunni, þegar fjórtánda stýrivaxtahækkunin var tilkynnt, olli engum vonbrigðum í þessum efnum. Staðfesti fundurinn að núverandi seðlabankastjóri er á röngum stað og í röngu starfi. Hann hefur valdið skuldurum óafturkræfum fjárhagsskaða og ekki í fyrsta sinn. Sá vandi á eftir að stökkbreytast á næstu mánuðum gangi spár mínar eftir.
Seðlabankastjóri söng á fundinum að peningastefnan væri að virka, en helsta hlutverk bankans er að halda verðbólgunni niðri. Yfirlýsingin er froða, en hún veitir okkur aftur á móti sýn inn í hliðarveruleika Ásgeirs Jónssonar. Manninn dreymir nefnilega um að vera álitið snjallmenni og beitir hann því missögnum til að byggja upp falska ímynd í stað þess að gangast við eigin axarsköftum með sómakærum hætti.
Stöplaritið sem hér fylgir endurspeglar aftur á móti raunveruleikann sem almenningur býr við. Uppsöfnuð verðbólga síðan að Ásgeir var skipaður seðlabankastjóri af Katrínu Jakobsdóttur er 26,7 prósent. Árleg bólgan hefur því verið á bilinu 6,8 til 7,5 prósent í tíð Ásgeirs, allt eftir því hvaða reikniaðferð er notuð. Það er allt að 50 prósent meiri árleg verðbólga en var að jafnaði alla öldina fyrir skipunartíma Ásgeirs. Kjörnuð niðurstaða myndarinnar er að peningastefna Ásgeirs er ekki annað en húmbúkk, klastrið eitt, sem gagnast eingöngu efnafólki.
Verkfærakista og lyfjaskápur Seðlabanka Íslands hefur að geyma ýmis prýðileg tól og bólgulyf sem unnið geta gegn verðbólgu, en vegna rangrar notkunar, rangra tímasetninga, rangra greininga, rangra ályktana, rangra ákvarðana og ábyrgðarlausra tjáninga seðlabankastjóra þá er verðbólgan óbeisluð. Og fyrir vikið þá er tiltrú til bankans uppurin. Skortur á tiltrú veldur síðan ósamstöðu milli hagaðila, sem aftur torveldar verkið að koma traustu beisli í gin verðbólgumóra.
…hann er menntaður hagfræðingur.
Ástandið er áþekkt aðstæðum sem formaður Byggiðnar lýsir í nýrri grein varðandi húsnæðisleka og myglu. Segir hann að starfsfólk í byggingariðnaði skorti bæði hæfni og menntun. Að ófaglærðir fái að leika lausum hala við húsbyggingar á Íslandi með tilheyrandi leka- og mygluvanda. Staða seðlabankastjóra er öllu alvarlegri því hann er menntaður hagfræðingur. Það skilur okkur eftir með þá niðurstöðu að hann skortir hæfni til að sinna starfi seðlabankastjóra. Mikil árleg verðbólga talar sínu máli möglunarlaust alveg eins og lekar og mygla gerir varðandi gæði fasteigna.
Óábyrgar tjáningar seðlabankastjóra eru sér kapítuli og hafa svo sannarlega haft skaðleg áhrif. Hver man til dæmis ekki eftir fleygum orðum hans að bjartir tímar væru í nánd aðeins nokkrum sekúndum fyrir fjármálahrunið mikla. Og hver man ekki eftir því þegar hann sagði vexti komna til með að vera lága á Íslandi. Tjáningalisti tungufossins er langur og rennir enn einni stoðinni undir þá ályktun mína að Ásgeiri veldur ekki starfi seðlabankastjóra. Færustu seðlabankastjórarnir eru orðvarir og forðast kastljósið ef mögulegt er.
Í Svíþjóð þá er verðbólga heldur hærri en á Íslandi, en stýrivextir þar eru aðeins 3,75 prósent á meðan þeir eru 9,25 prósent á Íslandi. Þetta segir allt sem segja þarf um kákið sem fylgir Ásgeiri og fyrir hverja hann vinnur. Katrín Jakobsdóttir forsætisráðherra ber pólitíska ábyrgð á Seðlabankanum og því er ekki hægt að búast við breyttri forystu í bankanum. Maður vonast þó eftir að ríkisstjórnin fari frá völdum sem fyrst svo kjósa megi nýtt fólk til ábyrgðarstarfa því nýir vendir sópa best.