- Advertisement -

Nýr skandall í Landsrétti

Þetta er stórmál og viðkomandi dómarar hljóta að óska eftir lausn frá dómarastörfum.

Jóhann Þorvarðarson skrifar:

Aðalsteinn Egill Jónasson.

Landsréttardómararnir Hervör Þorvaldsdóttir og Aðalsteinn Egill Jónasson skipa frægt lubbagengi innan Landsréttar. Sagt hefur verið í mín eyru að þau hirði ekki endilega um grundvallaratriði Stjórnarskrár Íslands eða landslaga. Í samhenginu eru atriði eins og hlutleysi og hæfi nefnt til sögunnar. Einnig hefur virtur prófessor í skaðabótarétti látið hafa eftir sér að skaðabótareglur og reglan um sérfræðiábyrgð sé togað til og tvistað til að fá þóknanlega dómsniðurstöðu. Sem sagt, geðþóttadómgæsla! Ég andmæli ekki skoðuninni enda sjálfur með milliliðalausa reynslu af háttsemi lubbanna. Hef horft upp á í beinni hvernig grundvallaratriði voru virt að vettugi, dómafordæmi Hæstaréttar hent fyrir róða, virkni ábyrgðarreglu vikið til hliðar og eiðsvörnu vitni lögð orð í munn. Sönnunargögn liggja fyrir um þessa dapurlegu hegðun. Svo illa er Landsréttur staddur að gárungar tala um nýtt Kópavogshæli. Sjálfur kýs ég að taka ekki svona til orða, en ég hafði gaman af samlíkingunni. Finnst halla á vistmenn gamla hælisins, eiga jákvæðari samanburð skilið!

Nýr ósómi hefur nú litið dagsins ljós. Hæstiréttur Íslands ómerkti í vikunni tvo Landsréttardóma sem umrædd lubbamenni tóku þátt í að dæma. Og hver ætli að ástæðan sé? Jú, Hervör Þorvaldsdóttir og Aðalsteinn Egill Jónasson voru vanhæf til að dæma í málunum. Spáið í stöðuna sem upp er komin, landsmenn geta ekki gengið að því vísu að þessir dómarar gæti að eigin hæfi til að dæma í málum. Þar með eru allir dómar sem lubbamennin hafa komið að eitt stórt spurningarmerki. Hæstiréttur vísaði báðum málum til „löglegrar“ málsmeðferðar. Þetta er stórmál og viðkomandi dómarar hljóta að óska eftir lausn frá dómarastörfum. Ásýnd um hlutleysi Landsréttar er undir í málinu og einnig virðing fyrir Stjórnarskrá landsins!

Ég hef áður sagt frá því hér á Miðjunni að þetta gengi lagði dómkvöddum og eiðsvörnum matsmanni orð í munn í máli sem ég sjálfur flutti fyrir Landsrétti samanber þessi grein hér „Óhreinindi Landsréttar!“. Í minni heimasveit þá heitir þetta að ljúga upp á fólk. Síðan fjalla ég um í annarri grein hvernig lubbagengið vék til hliðar með geðþóttavaldi dómafordæmi Hæstaréttar og reglunni um sérfræðiábyrgð samanber „Landsréttur drullumallar og ræðst á neytendur!“ Ég skora á ykkur að lesa þessar örstuttu greinar. Þær segja sögu sem ætti að vera skyldulesning í gaggó.  

Þetta endar ekki hér því nýlega skrifaði Marínó G Njálsson um þriðja dóminn þar sem vanhæfi Aðalsteins Egils Jónassonar kemur við sögu samanber „Bullandi vanhæfur dómari í Landsrétti“. Svo er hér stuðningsgrein við grein Marínós eftir mig „Maðurinn heitir Aðalsteinn Egill Jónasson“.  

Það er óhætt að slá því föstu að Hervör og Aðalsteinn Egill leggi sig fram um að viðhalda skammarlegri falleinkunn sem þjóðin gaf dómstólum landsins snemma á árinu. Þjóðin ber lítið sem ekkert traust til dómstóla. Aðalsteinn Egill Jónasson hefur aðeins verið Landsréttardómari í fáeina mánuði og afrekað allan þennan ósóma! Nauðsynlegt er fyrir réttbær yfirvöld að grípa í taumana. Hlutlaus ásýnd dómstóla landsins er undir og líka sjálf Stjórnarskráin. Virðing fyrir lögum er undir árás innan frá. Þetta er farið að líkjast gamla ráðstjórnarríkinu Sovét!

Ef þar til bærir aðilar grípa ekki til ráðstafana þá er samt ljós við enda ganganna. Mannréttindardómstóll Evrópu fellir brátt dóm í stóra Landsréttarmálinu. Ég spái að sá dómur verði náðarhögg Landsréttar. Gefst þá þjóðinni kærkomið tækifæri til að endurskipuleggja dómstólakerfið og spúla ósómann út. Það myndi efla félagsauð þjóðarinnar.


Auglýsing

Tengdar fréttir sem þú gætir haft áhuga á að lesa: