Óhætt er að slá því föstu að Stefán hafi gjaldfellt starfsheitið blaðamaður og minnkað trúverðugleika Moggans enn frekar.
Jóhann Þorvarðarson skrifar:
Það er gert í formi meints viðtals við Björgólf Jóhannsson, sem ekki fyrir svo löngu stýrði Icelandair Group niður á við, og er í dag tímabundinn forstjóri Samherja.
Í tilraun til að rétta hlut sinn í opinberri umræðu varðandi starfsemi Samherja í Namibíu þá sendi félagið frá sér yfirlýsingu í dag í gegnum fjölmiðil sem er hliðhollur Samherja, Morgunblaðið. Það er gert í formi meints viðtals við Björgólf Jóhannsson, sem ekki fyrir svo löngu stýrði Icelandair Group niður á við, og er í dag tímabundinn forstjóri Samherja. Viðtalið birtist á blaðsíðu 24 í blaði dagsins sem var dreift ókeypis til landsmanna. Þar hefur launaði blaðamaðurinn Stefán E. Stefánsson eftirfarandi orðrétt og gagnrýnislaust eftir Björgólfi „Greiðslur til namibískra aðila á tímabilinu námu samtals 21 milljarði króna á gengi dagsins í dag“. Umrætt tímabil er árabilið 2012-2018. Síðan er sagt að stærsti útgjaldaliðirnir hafi verið laun, greiðslur til namibískra samstarfsaðila og veiðigjöld. Þetta eru upplýsingar sem Björgólfur dregur alls ekki handahófskennt upp úr skýrslu sem norska lögfræðifirmað Wikborg Rein vann fyrir Samherja gegn myndarlegri þóknun. Allt er þetta auðvitað mjög hlutlaust! Ætlast er til að múgurinn gleypi upplýsingarnar sem nýjan sannleika um leið og þess var óskað í hinu meinta viðtali að umfjöllun eftirleiðis verði sanngjörn. Svona eins og allir aðrir hafi verið ósanngjarnir og ómálefnalegir hingað til. Líka þeir sem fjalla um málið í Namibíu.
Var nú ekki úr háum söðli að detta.
Stefáni og Morgunblaðinu þótti ekki áhugavert að spyrja nánar og fá upplýsingar um til dæmis hvað mikið af þessari fjárhæð eru veiðigjöld. Þá væri hægt að gera samanburð við greidd veiðigjöld á Íslandi. Nei, það hentar ekki tilgangi þessa meinta viðtals. Óhætt er að slá því föstu að Stefán hafi gjaldfellt starfsheitið blaðamaður og minnkað trúverðugleika Moggans enn frekar. Var nú ekki úr háum söðli að detta.
Svo er það spurning dagsins, af hverju birtir Samherji ekki skýrslu Wikborg og Rein svo hver sem er geti lesið, rannsakað og lagt eigið hlutlaust mat á hlutina?