Gullfoss, nýr hvalaskoðunar- og sjóstangveiðibátur á Akranesi, fór í jómfrúarferð sína í gær, við lok Írskra daga. Regína Ásvaldsdóttir, bæjarstjóri var með í för og landaði hún fyrsta fiskinum um borð. „Hún veiddi þónokkra fiska, tók tvo makríla í hali og veiddi þorsk líka,“ segir Gunnar Leifur Stefánsson einn eigenda Gullfoss. „Það var mokveiði hjá öllum. Báturinn kemur vel út og allir voru ánægðir. Svo grilluðum við aflann á heimleiðinni,“ sagði Gunnar. Frá þessu segir á vef Skessuhorns, skesshorn.is.
Gullfoss verður eini báturinn hér á landi sem býður upp á blöndu af sjóstangveiði og hvalaskoðun, en hann tekur 100 farþega og 25 veiðistangir eru um borð. Í þessari fyrstu ferð veiddust tugir fiska; ýsa, þorskur, ufsi og makríll sem nýlega er genginn hér inn á veiðislóð. „Við sigldum bara rétt út fyrir höfnina. Hér við Akranes er alls staðar fiskur og sérstaklega mikið af makríl. Hvalurinn er svo hérna rétt fyrir utan.“
Sjá nánar hér.