Vetur á Spáni: Þá er ferðin hafin. Fórum af stað klukkan fimm í morgun. Förum með Norrænu síðdegis, yfir hafið. Til Þórshafnar í Færeyjum.
Langaði meira að keyra rangsælis. Veður leyfði það ekki. Þá er að fara norðurleiðina. Gerum ráð fyrir morgunkaffi á Bláu könnunni á Akureyri. Og að við náum tímanlega til Seyðisfjarðar.
Bensínið kostaði 200 krónur og níutíu aura lítrinn. Gerist varla ódýrara á Íslandi. Það er að segja fyrir okkur sem ekki eru meðlimir í Costco.
Bíllinn er velbúinn. Leiðsögukerfi, Spotify í hljóðkerfinu, bækur á Storytel. Ekki má gleyma að bíllinn er á Toyo-harðskeljadekkjum.