„Lág verðbólga síðustu ár, stöðugar verðbólguvæntingar nálægt markmiði, veruleg verðhjöðnun verðlags án húsnæðiskostnaðar ásamt lækkun jafnvægisraunstýrivaxta gefa fullt tilefni fyrir peningastefnunefndina að fikra sig áfram í lækkun stýrivaxta en peningastefnunefnd tilkynnir ákvörðun sína 17. maí næstkomandi,“ þetta segir í Hagsjá Landsbankans.
Þar segir og: „Við gerum ráð fyrir að peningastefnunefnd lækki stýrivexti um 0,25 prósentur á næsta vaxtaákvörðunarfundi en vaxtaákvörðunin verður tilkynnt 17. maí næstkomandi. Óvissan í kringum vaxtaákvörðunina nú er meiri en oft áður og helgast það helst af því að nú verða gefin út Peningamál með nýrri þjóðhags- og verðbólguspá. Nefndin mun því styðjast við nýja spá sem kann að breyta nokkuð þeim forsendum sem hún hefur haft til að styðjast við í síðustu þremur ákvörðunum. Við teljum að nefndin muni einkum íhuga óbreytta vexti eða lækkun upp á 0,25-0,5 prósentur.“