- Advertisement -

Skelfileg arfleifð Katrínar að teiknast upp

Jóhann Þorvarðarson skrifar:

Vinstri græn, sem eru á móti hernaði, hafa leitt ríkisstjórn sem samþykkt hefur mestu fjárfestingar í hernaðarmannvirkjum á Íslandi síðan í kalda stríðinu. Katrín sprangar síðan um á NATO fundum eins og medalíu hlaðinn herforingi, sem kominn er til mestu metorða.

Sú mynd er að teiknast upp að stjórnmálaleg arfleifð Katrínar Jakobsdóttur fer í sömu glatkistu og arfleifð Davíðs Oddssonar sem tókst að koma þeirri skipan á að landið hrundi með hvelli. Frægðarlisti Katrínar er ekki síðri og verður ljótari eftir því sem líður á stjórnmálaferil hennar. Skoðum nokkur grafalvarleg dæmi.

Katrínu hefur tekist að skemma stjórnarskrármálið með því að bjóða upp á útvatnaða trakteringu í málinu. Málsmeðferð sem enginn skilur og engu skilar. Þrátt fyrir að þjóðin sé fyrir löngu búin að veita Katrínu leiðsögn um hvað landsmenn vilja þá gerir hún bara eitthvað allt annað. Hún hlustar ekki því Katrín telur sig vita betur. Hún er svo svaðalega klár að eigin mati.

Landsréttarmálið er einnig heimsfrægt. Mál sem hafði engar aðrar pólitískar afleiðingar en að Sigríði Andersen var fórnað. Dómur Mannréttindardómstóls Evrópu breytti heldur engu eða að ásjóna landsins á alþjóðavettvangi biði fordæmalaust afhroð. Áfram heldur Katrín samstarfi við Sjálfstæðisflokkinn eins og ekkert sé.

Þú gætir haft áhuga á þessum

Já, og áfram skal starfað með flokknum.

Salan á stórum hlut ríkisins í Íslandsbanka á geipilegu undirverði er farin að mælast í milljarða tugum. Þarna voru peningar sem komið hefðu sé vel í uppbyggingu heilbrigðiskerfisins, en Kötu fannst nærtækara að veita Sjálfstæðisflokknum gælur. Já, og áfram skal starfað með flokknum.

Vinstri græn, sem eru á móti hernaði, hafa leitt ríkisstjórn sem samþykkt hefur mestu fjárfestingar í hernaðarmannvirkjum á Íslandi síðan í kalda stríðinu. Katrín sprangar síðan um á NATO fundum eins og medalíu hlaðinn herforingi, sem kominn er til mestu metorða. Og áfram skal unnið með Sjálfstæðisflokknum.

Innrás norsks fiskeldis í firði landsins var mætt með rauðum dreglum. Af tilefninu þá var Úrskurðarnefndar í umhverfis- og auðlindamálum og Mast óvirkjað svo auðvelda mætti innkomu mengunarvaldanna. Gefinn var afsláttur á umhverfisverndinni og smánar laxeldisgjald er innheimt. Firðir fyllast að fiskeldismengun og laxar synda um vanskapaðir. Er þeim síðan dælt um borð í erlend sláturskip svo ekki þurfi að skapa aukna atvinnu í landi. Við fáum í staðinn að halda eftir skítnum og erfðablöndun náttúrulaxins. Hagurinn er síðan að mestu fluttur í skattaskjól. Hinn meinti umhverfisflokkur heldur bara áfram að starfa með Sjálfstæðisflokknum því það er svo gaman að vera herskár forsætis og þykjustu umhverfissinni.

Katrín sprangar síðan um á NATO fundum eins og medalíu hlaðinn herforingi, sem kominn er til mestu metorða.

Sífelldar tilslakanir á sóttvörnum, bara til að þurfa að herða aftur á, er farið að valda mikilli efnahags- og rekstrarlegri óvissu í landinu. Enginn er fyrirsjáanleikinn því Katrín bugtar sig og beygir fyrir frelsi Sjálfstæðisflokksins til að sýkja aðra eins og forseti landsins lýsir málinu.    

Innmúraður Sjálfstæðismaður fékk að eiga kósístund með óinnsigluðum kjörgögnum aleinn í Borgarnesi. Og þrátt fyrir að búið sé að benda á að engar fræðilegar líkur væru fyrir hendi að Sjálfstæðisflokkurinn gæti fengið 10 af þeim 12 atkvæðum sem dúkkuðu óvænt upp í seinni talningunni þá segir Katrín að það skipti hana engu máli. Seinni talningin stendur óhögguð og leikreglur kosninga og lýðræðis verða að lúffa. Búið er að afbrotavæða Alþingi í tíð Katrínar. Samstarfið við Sjálfstæðisflokkinn skal halda áfram sama hvað því kastljós leiðtogans er það sem telur.

Eilífðarbið fátækra eldri borgara og öryrkja eftir réttlætinu er vandræðaleg. Á sama tíma eru auðlindagjöld svo háðuleg að meira að segja sumir útgerðarmenn eru farnir að tala fyrir hækkun gjaldanna. Hegðun Seðlabankans og pólitísk afskipti hans eru síðan á ábyrgð Katrínar, sem ekkert gerir.

Já, og samgönguinnviði sem færast á útlenskar hendur í auknu mæli.

Á sviði umhverfisverndar þá er listinn ómerkilegur. Hverfist aðallega um lítinn ísmola sem hét Ok og hvarf tímabundið af sjónarsviðinu. Af tilefninu þá þótti Katrínu nauðsynlegt að fá mynd af sér við ruðninginn sem ísmolinn skyldi eftir. Ruðningur sem var víst bara ein malarhjólbara svo flytja þurfti stóran stein langan veg svo hægt væri að líma minnisvarða um molann litla á steininn. Á sama tíma fær sjávarútvegurinn undanþágu frá úrvinnslugjöldum mengandi efna. Listinn heldur áfram og leyfi ég lesendum að bæta við hann að vild.

Það blasir við að það molnar undan grunnstoðum samfélagsins á vakt Katrínar Jakobsdóttur. Alveg eins og þegar Davíð Oddsson var aðal gaurinn á landinu. Ég er ekki bara að tala um dómskerfið og lýðræðið heldur einnig heilbrigðis- og menntakerfið. Já, og samgönguinnviði sem færast á útlenskar hendur í auknu mæli. Er nú að koma æ betur í ljós að eigin orð Katrínar í sjónvarpssal um að hún væri með mótþróaröskun var ekki uppistand af hennar hálfu. Allt skal gert til að hún þurfi ekki að viðurkenna að það hafi verið stór mistök að fara í eina sæng með Sjálfstæðisflokknum.  


Tengdar fréttir sem þú gætir haft áhuga á að lesa: