Það er á ábyrgð ráðherra að sjá til þess að stjórnkerfi fiskveiða virki þannig að leyfilegur heildarafli allra tegunda nýtist með veiðum og skili verðmætum fyrir land og þjóð.
Örn Pálsson.
————————————————————————————————————————————–
Umræðan: Örn Pálsson, framkvæmdastjóri Landssambands smábátaeigenda, skrifaði þessa merkui grein:
Á undanförnum árum hefur ekki tekist að nýta leyfilegan heildarafla í ufsa. Afleiðingar þessa eru að á hverju ári tapast milljarðar króna í afla- og útflutningsverðmætum.
Landssamband smábátaeigenda ákvað að sitja ekki aðgerðalaust hjá gagnvart því kæruleysi sem stjórnvöld sýna í málinu. Þann 11. desember sl. var sent bréf til atvinnuvegaráðuneytisins þar sem vakin var athygli á vannýttum ufsa. Óskað var eftir því að ufsaafli dagróðrabáta, sem veiddur væri á króka og í net, teldist hvorki til krókaaflamarks né aflamarks. Skemmst er frá því að segja að þrátt fyrir ítrekanir um svör við erindinu hefur ráðuneytið ekki svarað því.
Í bréfinu var birt meðfylgjandi tafla sem sýndi að á síðustu fimm fiskveiðiárum hefðu rúmlega 200 þúsund tonn af ufsa verið óveidd (óslægð).
Eins og lesa má úr töflunni hefur óveitt magn farið vaxandi sem hlutfall af útgefnum heimildum og verið meira en helmingur síðustu tvö fiskveiðiárin. Ef 200 krónur fengjust fyrir hvert kíló gæti aflaverðmæti þess ufsa, sem ekki var veiddur á síðustu fimm fiskveiðiárum, numið allt að 40 milljörðum króna.
Það er á ábyrgð ráðherra að sjá til þess að stjórnkerfi fiskveiða virki þannig að leyfilegur heildarafli allra tegunda nýtist með veiðum og skili verðmætum fyrir land og þjóð. Því vekur það furðu að ráðuneytið hafi ekki brugðist við bréfi LS, hvorki með skriflegu svari né ósk um viðræður. Það er mat LS að gera þurfi breytingar á stjórn fiskveiða sem tryggi auknar veiðar á ufsa.
Til þessa hafa ráðherrar talið sér það til tekna að lýsa því yfir að þeir fari í einu og öllu eftir ráðgjöf Hafrannsóknastofnunar um leyfilegan heildarafla á hverju fiskveiðiári. Eins og framangreint sýnir er þar aðeins hálf sagan sögð.
