Í morgun úrskurðaði Héraðsdómur Reykjaness að maður á sjötugsaldri, sem handtekinn var í Hafnarfirði í gær vegna skotárásar skuli vistaður á viðeigandi stofnun.
Lögreglan tók manninn höndum í hádeginu í gær og þurfti Lögreglan á höfuðborgarsvæðinu að óska eftir gæsluvarðhaldi eða annarri vistun fyrir hádegi í dag eða láta manninn lausan.
Alltaf þegar grunaðir afbrotamenn eru úrskurðaðir til vistunar á viðeigandi stofnun er það með vísan til andlegra eða sálrænna þátta, sem gera það að verkum að slíkt úrræði eigi betur við en gæsluvarðhald.
Sá grunaði skaut á tvo bíla á bílastæði milli fjölbýlishúss og leikskóla við Miðvang í Hafnarfirði á áttunda tímanum í gær, en maður og ungur sonur hans voru í öðrum bílnum.
Eins og greint var frá í gær sat lögregla um íbúð mannsins og ræddi samningamaður lögreglu við hann í gegnum síma. Í kjölfarið gaf maðurinn sig svo fram rétt fyrir klukkan hálf eitt í gær.
Mjög mikill viðbúnaður var vegna skotárásarinnar, en á þriðja tug lögreglumanna kom að aðgerðinni.