- Advertisement -

Skyrslettur útibússtjórans

Svo er formennska Þorgerðar yfir útibúinu ekki komin til af góðu.

Jóhann Þorvarðarson skrifar:

Útibússtjóri Sjálfstæðisflokksins í Viðreisn hún Þorgerður Katrín Gunnarsdóttir var með undarlega skyrslettu um daginn sem beint var að Samfylkingunni. Sakar hún flokkinn um ábyrgðarleysi og eyðslugleði án þess að rökstyðja mál sitt. Orðrétt sagði útibússtjórinn í nýlegri grein að „Hætta er á að það kalli á stóraukin hefðbundin útgjöld og hærri skatta.  ….. Það gerðist síðast og mun gerast aftur“.

Samfylkingin var síðast í ríkisstjórn í kjölfar fjármálahrunsins og tók við þjóðarskútunni marandi í hálfu kafi  eftir framgöngu Sjálfstæðis- og Framsóknarflokks. Sjálf var Þorgerður varaformaður Sjálfstæðisflokksins árin 2005-2010 og ráðherra frá 2003 til ársins 2010. Svo slæm var staða Íslands eftir yfirreið flokkanna og Þorgerðar Katrínar að fá þurfti neyðaraðstoð frá Alþjóða gjaldeyrissjóðnum. Kallað var eftir ráðgjöf um hvernig best væri að koma skútunni aftur á flot. Það tókst með erfiðismunum, fórnum og miklu fjárhagslegu tapi margra. Áhrifanna gætti út fyrir landsteinanna þar sem til dæmis breskt sveitarfélag og hjúkrunarheimili urðu fyrir barðinu. Án þess að ég sé að verja Samfylkinguna né Vinstri græn þá var hlutverk flokkanna ekki öfundsvert. Margar ákvarðanir voru nauðbeygðar.   

Skyrsletta Þorgerðar rifjar upp hennar fleygustu orð þegar hún lýsti því kokhraust yfir að tiltekinn breskur prófessor við London School of Economics ætti að fara í endurmenntun þegar hann varaði við stöðu mála á Íslandi fyrir hrunið. Orðin segja í raun allt sem segja þarf um pólitískt ábyrgðarleysi Þorgerðar Katrínar. Svo er það spurningin sem ekki hefur fengist svar við. Af hverju fékk eiginmaður hennar afskrifaðar 900 milljónir króna af eigin skuldum í kjölfar hrunsins?  Skyrsletta útibússtjórans vekur enn meiri furðu þegar haft er í huga að Viðreisn er í meirihlutasamstarfi með Samfylkingunni í Reykjavík.

Skrif Þorgerðar endurspegla auðvitað fyrst og síðast hrokafulla manneskju þrátt fyrir rándýrar pólitískar svaðilfarir. Svo er formennska Þorgerðar yfir útibúinu ekki komin til af góðu. Hún tók við af Benedikt Jóhannessyni sem gerði lítið úr máli er varðaði kynferðisbrot og felldi heila ríkisstjórn.


Tengdar fréttir sem þú gætir haft áhuga á að lesa: