„Þingmenn Norðausturkjördæmis áttu fund með dómsmálaráðherra, fangelsismálastjóra og lögreglustjóra NA í dag um fangelsismálin. Tel einsýnt að ráðherra hlusti eftir því sem þar kom fram sem og á fundi þessara aðila fyrr í dag með bæjarstjórn Akureyrar. Ákvörðunin er ekki góð og ekki boðlegt að fara í slíkar breytingar án þess að samtal og samráð eigi sér stað við hlutaðeigandi aðila,“ segir Bjarkey Olsen Gunnarsdóttir þingflokksformaður Vinstri grænna.
Bjarkey sem er þingmaður Norðausturkjördæmis, fyrrum höfuðbóls Vinstri grænna, gagnrýnir, sem svo margir aðrir, ákvörðun Áslaugar Örnu Sigurbjörnsdóttur, um lokun fangelsisins á Akureyri.
Hvorki Bjarkey Olsen né Áslaug Arna eru sem hver annar þingmaður. Þær eru báðar í fremstu forystu sinna flokka. Ekki hefur áður opinberast átök milli Vinstri grænna og Sjálfstæðisflokks sem nú. Til þessa hefur að mestu tekist að halda ágreiningi undir yfirborðinu. Kannski er þetta merki þess sem koma skal. Það styttist óðum til kosninga.
Allar líkur eru á að það verði Bjarkey Olsen sem verði að éta andstöðuna ofan í sig frekar en að Áslaug Arna skipti um skoðun. Því eru meiri líkur en minni á að Vinstri græn lúffi í deilunni við Sjálfstæðisflokkinn.