Jóhann Þorvarðarson:
Danir eru augljóslega að spila miklu betra mót en Íslendingar og er yfirklór forsætisráðherra af aumustu sort.
Kristrún Frostadóttir, Þorgerður Katrín Gunnarsdóttir, Inga Sæland og Björn Leví Gunnarsson.
Oddvitar stjórnmálaflokka, nema Sósíalistaflokksins, komu saman í Silfri Egils um helgina. Óhætt er að segja að formenn stjórnarflokkanna hafi verið eins og steingervingar úr löngu liðinni forneskju. Metnaðarleysi ofan á andvaraleysi hrópaði á mann.
Framsóknarformaðurinn síbyljaði enn eina ferðina um að gera þyrfti átak í húsnæðismálum. Eins og áður hefur ekkert annað gerst en að fölsk loforð eru sett á blað. Þetta er flokkurinn, ásamt Sjálfstæðisflokki, sem græðgisvæddi íbúðamarkaðinn og setti gamla Íbúðalánasjóðinn í þann farveg að brátt endar hann með hundruð milljarða króna gjaldþroti. Orð hans eru orðin eins og jöpluð tugga, næringarlaus.
Formaður Sjálfstæðisflokksins var ultra þreytulegur að sjá og hafði ekki annað fram að færa en að opinbera skítahræðslu sína gagnvart uppgangi Samfylkingarinnar. Fylgi Sjálfstæðisflokksins er samkvæmt skoðanakönnunum á svo mikilli niðurleið að brátt verður hann kominn á hvíldarbekk íslenskra stjórnmála inn á Þjóðminjasafni.
Svo var það formaður Vinstri grænna, en hún rak smiðshöggið á metnaðarleysi ríkisstjórnarinnar við efnahagsstjórnina. Viðbrögð hennar við yfirlýsingu stjórnarandstöðunnar um að efnahagsstjórnin sé í ólestri voru grátleg. Hún sagði að verðbólga og atvinnuleysi væri meiri í Svíþjóð. Sem sagt, hún ákvað að bera Íslandi saman við það Norðurlanda sem stendur sig verst í stað samanburðar við það besta. Kannski var hún súr því forsætisráðherra Svíþjóðar kom ekki á nýafstaðinn Evrópuráðsfund og ákvað því að sparka í sænska sköflunginn í hefndarskyni.
Til að standa vörð um metnað Íslendinga þá bæti ég hér með úr og bera Ísland saman við Danmörku samanber myndin sem fylgir. Danir eru augljóslega að spila miklu betra mót en Íslendingar og er yfirklór forsætisráðherra af aumustu sort.
