Við þann óheiðarleika féll sú ríkisstjórn.
Jóhann Þorvarðarson skrifar:
Hann neyddist til að segja af sér formennsku í Viðreisn eftir að hafa gert lítið úr opinberri umræðu um uppreist æru tveggja kynferðisbrotamanna sem eru innvígðir og innmúraðir sjálfstæðismenn. Þið munið líka að Bjarni Ben fjármálaráðherra, náinn ættingi Benedikts, hafði ekki fyrir því að upplýsa samstarfsflokka í ríkisstjórn um að faðir hans hafði ritað meðmælabréf með öðrum þessara manna. Við þann óheiðarleika féll sú ríkisstjórn. Benedikt fullyrti síðar opinberlega að almenningur væri búinn að gleyma umræðunni. Þar las Benedikt þjóðina snarvitlaust. Sýndi yfirburða dómgreindarleysi og hrökklaðist frá.
Í nýlegri blaðagrein er hann með falskan áróður um að borgin eigi ekki að ganga að kjarakröfum Eflingar því það hafi í för með sér höfrungahlaup. Hér les hann aftur snarvitlaust í aðstæður og kynnir sér ekki málin að gagni.
Í nýlegri grein á Miðjunni „Bjarni Ben fer með fleipur“ sýndi ég fram á með óyggjandi hætti að hálaunafólk þjóðarinnar byrjaði höfrungahlaupið fyrir fáeinum árum. Það er því ekki við láglaunafólk að sakast að laun eru á uppleið! Benedikt er enn og aftur úr takti við raunveruleikann sem við hin lifum í.
Elítan sem frændurnir tilheyra virðist telja það til dygða að segja almenningi ósatt og rangfæra opinberar staðreyndir!
Ágætt er svo að minnast á nýlega skoðanakönnun sem sýnir að vaxandi meirihluti styður launakröfur Eflingar. Vonandi ná frændurnir að hesthúsa vilja meirihlutans!